SHILLONG: West Shillong-ni MLA aro Congress doloniko suspend ka·ako ba dontongatako man·gipa MLA Mohendro Rapsang, da·o Congress-ni MLA ong·kuengoba, 2023 bilsini Assembly election-o Congress doloni susajawaha ine parakataha.
Re·baenggipa antio ua National People’s Party (NPP)-o napskanaba gnang ineba Rapsang parakataha.
West Shillong MLA-ni parakatani gitade, ua da·o sal 10-ni gisepon Congress dolo membor ong·aniko aro MLA-ni kamkoba watgnok aro ua gital dolo napskagnok.
“Da·o dipetde anga Congress dolni MLA-an ong·kuengpiti indiba anga ia election-o Congress-oni susajawaha maina angko da·onan Congress dolo rimnappilkuja. Anga Congress doloni bakan ong·katna miksongenga aro gital political dolo napskana sienga aro angni chanchiani gitade anga NPP-o napgen,” ine Rapsang parakataha.
Congress doloni ong·katna uni manchienggipani bidingo janapatengon, uko aro gipin sakbri MLA-rangko Congress dolni ra·galahani gimin ua suk ong·nikjaha ine Rapsang parakataha.
Jolo songdongenggipa manderangna aro gittimtangna namroro silroroaniko ra·baanian ia election-o uni mongsonggipa daito ong·gen ineba West Shillong-ni MLA parakataha.
Chief Minister Conrad K Sangma-ni dilanichi MDA sorkari, chadamberangna bang·en gital program-rangko ra·gate on·aha ineba ua mittelpilaniko parakataha.
“A·dokni Chief Minister Conrad Sangma saksa dambe aro bilakgipa ong·e manderangna, kangal cholgrirangna, game ge·e cha·giparangna, kal·susagiparangna, chadamberangna aro dingtang dingtang program-rangko bang·en ra·gate on·enga. Da·o ia chang election-oba NPP-ni MLA-rang bang·bate chegenchimode mikkangchi Meghalaya a·doko dingtanganiko nikna man·gen,” ine West Shillong MLA parakataha.
