TURA: Meghalaya a·dokni SSA skulrango skigiparang bang·gija dormaharangkosa cha·paengoba ia dormaharangko somoi gita man·rongjaengani a·sel skigiparang neng·nikanirangko chagrongna nangtokengani gimin skigiparangni dormahako bariatenba ia dormahako somoi gita on·jringchina All Garo Hills SSA School Teachers Association (AGHSSASTA), a·dokni Chief Minister Conrad K Sangma-na sedoataha.
“Ia sal somoirango pilak bosturangni daman rakbatahani gimin aro unbaksana bi·sarangko poraiatani koros aro GST gita dakgipa kajinarangkoba gamna nangengani a·sel SSA skigiparang bang·a neng·nikanirangko chagrongna nangtokenga. Uni gimin SSA skulrango skigiparangni dormahako ta·raken gipin skigiparang gitan apsan dake japrako gong 45,000-ona bariatchina chinga mol·molenga,” ine AGHSSASTA-ni dilgiparang parakataha.
Da·o dipet SSA skulrango skigiparang jabong jadokrangni giseposa an·tangtangni dormaharangko man·na nangengani a·sel neng·nikanirangko chagrongna nangtokengani gimin skigiparangna dormahako jaantian somoi gita on·chinaba AGHSSASTA dabiangaha.
SSA skulrango skigiparangna 2016-17 PAB-ni bangki arrear-rangko ta·raken on·china gitaba AGHSSASTA, a·dokni Chief Minister-ko didiataha.
SSA skulrango skigiparangko kamo regularise ka·china aro skigiparangni dormaharangko skigipa sakprakni bank account gita chipatchinaba AGHSSASTA dabiangaha.
