Darechikgre songo Entrepreneurship Development program-ko ong·ata

TURA: Bristibar salo, NEHU Tura Campus-ni ning·o donggipa Biotech KISAN Hub-ni gita Village adoption aro Entrepreneurship Development program-ko Rongram Block-ni ning·o donggipa Darechikgre songo ong·atangaha aro ia program-ko ong·atanio Rongram Block-ni ning·o donggipa self help group (SHG)-rang aro gipinrangba bakko ra·angtokaha.
Ia program-ko NEHU-ni Vice Chancellor Prof Prabha Shankar Shukla, chairman ong·e dilangaha aro ia program-o NEHU Tura Campus-ni Campus-in-Charge Prof Sujata Gurudev, Horticulture Department-ni Assistant Professor aro Principal Investigator Dr Arindam Barman, Darechikgre songni Nokma Plainson A Sangma aro gipinrangba bakko ra·angaha.
Ia program-ko ong·atani mongsonggipa miksonganiara, game ge·e cha·enggipa manderangni kamko namdapatna, gital kolrangni gimin skie on·anichi pala sim·ani kamrangko namdapatanian ong·achim.
Ia program-ko ong·atanio Darechikgre songko jako ra·e nirok sandina gita NEHU-ni Vice Chancellor Prof Prabha Shankar Shukla aro Darechikgre songni Nokma Plainson A Sangma-ni gisepo dingtangmancha Memorandum of Agreement (MoA)-o soi ka·grikangjolaha.