TURA: North Garo Hills a·jao Mendima-oni Adokgre jolrangona kingkingan post office-rang dongkujae, Assam a·dokni Goalpara, Damra, Dudhnai, Rangjuli aro Dhupdhara sub-post office-ni ning·osa ga·akna nangkuengani a·sel da·onan North Garo Hills a·jani ia jolrango Assam-ni postal pin-code-kosa jakkalna nangkuengani gimin North Garo Hills a·jani Kharkutta-oba sub-post office-ko kulichina gita United Democratic Party (UDP)-ni Garo Hills youth wing dabiangaha.
Iani bidingo North Garo Hills a·jani Deputy Commissioner-na sedoatgipa chittio UDP GH youth wing-ni parakatani gitade, Kharkutta-o sub-post office dongkujae da·onan ia songrang, Assam-ni postal pin code-kosa jakkalna nangengani a·selan ia jolrango songdongenggipa dingtang dingtang neng·nikanirangko chagrongna nangtokengachim.
“Ia songrangara Meghalaya a·dok ning·o ga·akgipa biaprangan ong·genchimoba, ia songrango songdongenggipa manderang, Assam-ni postal pin code-kosa sena nangengani gimin uamangni Electionm Photo Identity Card (EPIC)-rangoba Assam-ni pin code-rangkosa on·enga aro iani a·selan ia jolni manderang Meghalaya a·dokni SIM card-rangna dorgastorangko galna man·tokjaenga. SIM card-rangkosan ong·aigija ia jolrango songdongenggipa manderang, Assam-ni pin code-ko sena nangengani a·sel online gita kamrangna aro poraianirangna dorgastorangko galna man·tokjaenga,” ine UDP GH youth wing-ni dilgiparang parakataha.
Ia jolrango sub-post office dongjani a·selan ia jolni manderang, Indian Postal Service-ni on·enggipa dingtang dingtang scheme-ni namgnirangkoba man·tokjaenga ineba UDP-ni GH youth wing parakataha.
Kharkutta Block-o sub-post office gita Indian Postal Service Department-na bang·en kajinarangko man·e on·ani cholrang dongachim ine janapatengon, Kharkutta-o sub-post office-ko kuligenchimode bang·en kajinarangko man·anichi Indian Postal Service Department-ko namdapatna dakchakani ong·genchim ine UDP GH youth wing parakataha.
Indake ong·engon, iandakgipa neng·nikanirangko chagrongna nangengani gimin UDP youth wing-ni dilgiparang agangrikon, iani bidingo kamrangko niatna gita North Garo Hills a·jani Deputy Commissioner aro North East Circle Shillong-ni Chief Postmaster ku·rachakaniko on·ataha ine u·iataha.
“Chinga UDP youth wing-ni gita pangnan jolo songdongenggipa manderangni namgnina kamrangko ka·na jotton ka·enga. Ia jolrango songdongenggipa manderangni iandakgipa neng·nikanirangko batanggimin somoirango seoka man·gipa Kharkutta constituency-ni dilgiparang niatna gisiko nangjahani gimin anga namen suk ong·ja. Kharkutta-o sub-post office-ko kulie on·china chingni didianiko North Garo Hills a·jani Deputy Commissioner aro North East Circle Shillong-ni Chief Postmaster-ba niatna ku·rachakaniko on·atahani gimin chinga namen kusi ong·a,” ine UDP state youth wing-ni vice president Anand M Marak parakataha.