SHILLONG: Shillong 101 Area-ni General Officer Commanding, Lit Gen KC Panchanathan-ni manggisiko Bristibar salo, bon·kame mande ra·pilskaaniko dakani ja·man Happy Valley Crematorium-o so·e galaha.
Lt Gen KC Panchanathan, re·anggipa December-ni 6 tariko rang·gitik ka·tong saaniko man·enba a·gilsakko watangahachim.
Lt Gen Panchanathan-ni manggisiko so·e galna skang, dingtangmancha una bon·kame mande ra·pilskaaniko dakanio military, police, CAPF aro civil official-rang bakko ra·angtokaha.
Lt Gen Panchanathan-ni manggisio Meghalaya sorkarini pal a·dokni PHE Minister Renikton Lyngdoh Tongkhar doneaha aro Assam sorkarini pal Assam-ni Environment & Forest Minister Chandra Mohan Patowary doneskaaha.
Army aro Air Staff-ni official-rangba una bon·kame mande ra·pilskaaniko on·na gita uni manggisio pul bibalrangko doneaha.
Lt Gen KC Panchanathan-na bon·kame mande ra·pilskaaniko dakanio bak ra·anggipa gipin official-rangara Eastern Air Command-ni General Officer Commanding-in-Chief Lt Gen RP Kalita, Eastern Air Command-ni Air Officer Commanding-in-Chief Air Marshal SP Dharkar aro gipinrang ong·a.
