TURA: West Garo Hills a·jani Chigitchakgre songko ‘Honey Village’ ba bija bitchini song dake jako ra·na gita re·anggipa Bristibar salo dingtangmancha program-ko North Eastern Hill University (NEHU) Tura Campus-ni ning·o donggipa Incubation Centre, ICAR-NIBSM baksa nangrime ong·atangaha aro ia program-ko ong·atanio NEHU Shillong-ni Vice Chancellor Prof PS Shukla, mongsonggipa sokgipa ong·e bakko ra·angaha.
Ia program-ko ong·atanio Gambegre Block-ni BDO SG Momin, NEHU Tura Campus-ni In-Charge Prof Sujata Gurudev, NEHU Tura campus-ni ning·o donggipa Incubation Centre-ni Nodal Officer Dr R Sasikumar, Tura DCIC-ni Functional Manager Frederick A Sangma aro gipin officer-rangba bakko ra·angaha.
Ia program-ko ong·atanio NEHU Shillong-ni Vice Chancellor Prof PS Shukla, jinmana aganprakengon, nokantion bijarangko jilna gita manchiahani gimin Aminda Ading, Aminda Rangsa, Aminda Simsanggre & Chigitchakgre songni manderangko mittelpilangaha.
Iana skang, ia program-ko ong·atani bidingo Tura DCIC-ni Functional Manager Frederick A Sangma, jinmana talate on·angengon, maikai bijarangko jilanichi songo noko janggi tangani gadangko namdapatna man·gen, uarangni giminba agan-talate on·angjolaha.
Ia program-o Incubation Centre-ni Nodal Officer Dr R Sasikumar-ba jinmana aganprakangengon, Chigitchakgre songo ‘Honey Village’ dake jako ra·na uamangni re·chakatani gimin jinmana agan-talate on·angaha.
Ia program-ko ong·atanio bija jilenggipa songrangoniko gimik sak 150 manderangko seokenba dingtangmancha bija jilani bakosrangkoba suale on·angjolaha.
Bija jilenggipa songrangoniko bija bitchirangko brepilskana gitaba ia tom·anio dingtangmancha NEHU Tura Campus-ni Incubation Centre aro Self Help Group dolni gisepo, Memorandum of Agreement (MoA)-o soi ka·grikangaha.