TURA: FOCUS program-ko Meghalaya a·dokni National People’s Party (NPP), an·tangtangni ra·gatgipa scheme ine manderangko cha·bokna jotton ka·enga ine Sukrobar salo, Assam-ni saksakamkam A·chik MLA aro BJP-ni dilgipa Dr Numal Momin matnangataha.
Sukrobar salo, ua Pa Togan Best Student Award-ko on·na gita program-ko ong·atanio bakko ra·na gita Tura-ona re·baahachim aro uni ja·man BJP-ni membor-rangkoba grongangjolahachim.
Game ge·e cha·enggipa manderangni namgnina ra·gatgipa FOCUS scheme-ko NPP-ni a·kangenggipani bidingo janapatengon, “A·dokni game ge·e cha·giparangna tangka paisarangko dakchake on·na gita Meghalaya sorkari baoniko kajinarangko man·enga? Ian game ge·e cha·enggipa manderangko dakchakna gita ma·mong sorkarini on·enggipa scheme-sa ong·a indiba uamang iako da·o election-na an·tangtangni ra·gatgipa scheme ine manderangna togiskaenga,” ine Momin parakataha.
Da·o dipet Meghalaya a·doko a·ningni aro buring bolgrimni gam-jinrangko bikotjachina gita niamko donmanahani gimin a·dok sorkari, kajinarangko man·ani kattaan dongja ineba Momin parakataha.
“Ia sal somoirango Meghalaya sorkari, tangka paisani gita inditan neng·nikanirangko chagrongna nangengani a·selan sorkario kam ka·enggipa manderangna dormaharangko on·na man·jaenga indide banoni kajinarangko bikote Meghalaya sorkari, tangka paisarangko suale rona man·gen? Uni gimin NPP, iandake ma·mong sorkarini dakchake on·enggipa tangka paisarangni gimin tol·na nangja. Conrad, Delhi-ona re·ange ma·mongni minister-rangko gronga changantian an·tangko name mesokronga indiba a·doktangona re·bapiljokode an·tangko dingtange mesokronga,” ine Assam-ni BJP MLA aganaha.
Meghalaya a·doko da·o BJP bilakrorobaengaha aro da·o gital chief minister-ba BJP dolonin ong·gnok ineba Bokajan constituency-ni MLA aro Assam Assembly-ni deputy speaker parakataha.
“Meghalaya a·doko gital sorkari chinga dilgen aro ian a·dokna namgni ong·gnok. 2023 election-o chinga dam 30-na baten seat-rangko chegen,” ine Momin parakataha.