TURA: Williamnagar jillani Balsrigittim aro Warimagre gittimrango songdongenggipa dol 1200 nokdangrangko sorkari niamo ong·atenba, ia nokdangrangna sorkarini a·arangko para dake on·skana songgigrike, Sombar salo a·dokni Chief Minister Conrad Sangma aro Williamnagar-ni MLA Marcuise Marak-ni jakchi ia a·a lekkarangko pakwate on·angaha.
Ia lekkarangko pakwate on·na gita program-ko ong·atanio a·dokni Chief Minister aro jolni MLA Marcuise Marak, Balsrigittimni dol 17 nokdangrangna aro Warimagre-ni dol 6 nokdangrangna a·a songgigrikani lekkarangko pakwate on·angaha.
Balsrigittim aro Warimagre gittimni manderangna a·a lekkarangko suale on·angani somoio a·dokni Chief Minister, jinmana aganprakangengon, ia gittim damgnio songdongenggipa manderang a·a lekkarang dongjani a·selan loan-rangko aro sorkarini dingtang dingtang namgnirangko ra·na man·tokjaengachim indiba iandakgipa gittimrango songdongenggipa manderangna sorkarini dingtang dingtang cholrangko on·na gita sorkari, a·a lekkarangko tarie on·na rakbee kamko ka·aha ine parakataha.
Williamnagar-o gitan Tura jillaoba sorkarini a·arango songdongenggipa manderang, apsan dakgipa neng·nikanirangko chagrongna nangtokengani gimin Tura jillanaba sorkari apsan dakgipa ja·kuko de·na sienga ineba Chief Minister parakataha.
Williamnagar-ni Balsrigittim aro Warimagre gittimo dol 1200-na baten nokdangrang, ru·utbea bilsirangna sorkarini a·ao songdong a·chaktokengahachim aro ia nokdangrang an·tangtangni songdongenggipa a·arangna sorkari baksa songgigrikna senge dongtokengachim ine nikna man·a.
W’nagar-ni Balsrigittim aro Warimagre-o songdongenggiparangna a·a lekkarangko pakwate on·a
Date:
Share post:
