AMPATI: Songadam nokadamrango wata chenga, sika koa aro uandakgipa jakni kamrangko ka·e cha·enggipa manderang baksana jolo bading chiwale cha·enggipa manderangna pala sim·anirangko dakna cholko on·na gita Bristibar aro Sukrobar salgnina, changdokgipa District Level Annual Industrial Exhibition-ko South West Garo Hills a·jani Ampati-o donggipa Students’ Field-o ong·atenga.
Ia exhibition-ko South West Garo Hills a·jani Superintendent of Police (SP) Stephen A Rynjah, mongsonggipa sokgipa ong·e do·ga oe on·angaha aro ia exhibition-ko a·bachengatanio ua jinmana aganprakangengon, sorkarini scheme-rangko ra·namangmangsan kamrangko ka·aijachina indiba an·tangtangni kamrango bimchipgiparang ong·china gita jakni kamrangko ka·e cha·enggipa songni nokni manderangko didiangaha.
Kamtango bimchipgipa ong·anian chu·sokani mongsonggipa chol ong·a ine janapatengon, saksa sakgipinna dakchakgrikchina aro saksa sakgipinoniko skie ra·grikchina gita Rynjah, jolni manderangko didiangaha.
Ia exhibition-ko a·bachengatanio dongpae bakko ra·anggipa gipin manderangara, DCIC-ni General Manager DFR Marak, Government Higher Secondary School-ni Principal KR Marak aro gipinrang ong·a.
Ia exhibition-ko ong·atanio dingtang dingtang songrangoni taribagimin bosturang, jekai boloniko sol·e tarigimin bosturang, wa·a aro reoniko tarigimin bosturang, babilsi aro gama ge·anio jakkalna gita jaktangchi tarigipa bosturang, ba·ra kancharang aro gipin bosturangkoba donenga.
Ampati-o 6-gipa District Level Annual Industrial Exhibition-ko ong·atenga
Date:
Share post:
