SHILLONG: NPP Shillong songjinmani constituency-rangoni susanasienggipa uamangni candidate-rangni bimingrangko mija Sombar-o parakataha. Ampareen Lyngdoh aro Mohendro Rapsang, jemangan mija Sombar-o party-o napaha uamang East aro West Shillong seat-rangoni election-rango susagen. Jasmine M Lyngdoh, Nongthymmai-oni, Ransom Sutnga, North Shillong-oni, Teibor Pathaw, Mawlai-oni aro Rocky Hek, Pynthorumkhrah-oni uamangni candidate-rang ong·e susaanggen ine party uamangni bimingrangkoba parakataha.
Madan Iewrynghep-o public meeting-ko ong·atao parakataha. NPP national president aro Chief Minister Conrad K Sangma tom·ao aganao uni pagipa PA Sangma sagi aro Ampareen-ni pagipa PG Marbaniang sagini gisepo meli-nangrimani donganirangko janape “An·ching pangnan ku·cholsan ong·enga gitan ong·engaha. Batanggimin salo an·ching jedake ku·cholsan ong·enga ua gitan ong·taienga aro chasongni gita an·chingni mikkango Meghalaya-ko mikkangchini salrangna ra·doangna pakripe ge·saoni ge·gipinona kam ka·aha aro chinga ku·cholsan kam ka·angkugen indake ia bilakgipa dilgiparang kamko ka·na a·bachengengaha aro namgipa kamko matchotatanggen,’’ Sangma aganaha.
Uamangchin majority bang·bate ra·bachongmotgen ine ka·donge agane, batanggimin bilsi bonga bilsirango sorkarini bang·a ra·bianirangko chagrongaha indiba manderangni gisik nanganirangko rakkienga ine ua janapaha.
Rama-sorokrangoni water supply-ona aro ma·giparangni janggi tangani indonga uni sorkarini chu·sokani bidingo Sangma janape aganaha.
“A·dokni GSDP batanggimin bilsi bongao 2011-oni 2016-ona 8% badeangaha,” bilsini tangka-paisa chamanio gong 9,000 kror-oni gong 18,000 kror-ona sorkarini tangka-paisa koros ka·ani dunagni ong·aha, CM aganaha.
