aSHILLONG: A·songni Prime Minister Narendra Modi-ni Shillong-ona re·baani somoio una ganatgipa Khasi jatni ganding chindingni gimin Trinamool Congress (TMC)-ni dilgipa aro gitcham cricketer Kirti Azad-ni agangipa kattarangna Meghalaya a·dokni Chief Minister Conrad K Sangma aro a·dokni BJP dolba suk ong·gijaniko parakattokaha.
Adita salrangna skang, a·songni Prime Minister Narendra Modi-ni Shillong-ona re·baanio, Khasi jatni ganding chindingko gane ka·gipa noksako social media-o mesokatenba, uni gangipa chola ba·rarangni gimin Kirti Azad adita kattarangko social media-o seatahachim aro uni iandake jatni gandingko chonnikahani gimin aro Prime Minister-ni kosako kragija kattarangko seatahani gimin Assam-ni Chief Minister Himanta Biswa Sarma-ba social media-o sechatakate, Kirti Azad-ni seatgipa kattarangko raken jegalatahachim.
Indake ong·engon, Meghalaya a·doko Khasi jatni ganding chindingko iandake seataniara jatko chonnikani gita ong·aha ine a·dokni Chief Minister Conrad K Sangma parakatenba, iani bidingo kemako bi·china TMC-ni dilgipao dabiangaha.
“Meghalaya a·doko Khasi jatni gangipa ganding chindingko aro India a·songni Prime Minister-ko iandakgipa kattarangchi agananiara namen ra·chakna man·gijani ong·aha,” ine Sangma parakataha.
Khasi jatrangni gangipa ganding chindingrangni gimin iandake TMC dilgipani social media-o seataniko Meghalaya BJP-ni state president Ernest Mawrie-ba raken jegalataha aro iandakgipa kamko Meghalaya a·dokni manderang maming dakeba ra·chakna man·jawa ine parakataha.
“Prime Minister Narendra Modi-ni rasong chabee gangipa Khasirangni gandingko TMC-ni dilgipa Kirti Azad, kragija kattarangchi aganaha aro ian TMC-ni asol gisikko mesokaniba ong·aha. Uni iandakgipa kattarangko seataniara Tribal-rangni kosako TMC-ni chanchianiko mesokani aro mikkang niteaniko mesokaniba ong·aha,” ine Mawrie parakatenba, iandakgipa kamko Meghalaya a·dokni manderang maming dakeba ra·chakna man·jawa ine parakataha.