TURA: South Tura constituency-ni gitcham MLA John Leslee K Sangma, Bharatiya Janata Party (BJP)-oni ong·katpilani ja·man Budbar salo, United Democratic Party (UDP)-o napangskaaha.
Sangma-ko gitcham MLA Sengman R Marak, UDP-ni membor Dr Pilne A Sangma, membor Tinas Ch Momin aro UDP West Garo Hills-ni president Ludwig Sangma, UDP-ona rimchaksoaha.
Sangma-ko UDP-ona rimchaksoangengon, “Anga South Tura-ni gitcham MLA John Leslee K Sangma aro uni manderangko UDP West Garo Hills-ni pal chingni party-ona rimchaksoenga. Uni UDP-ona re·baaniara chingni dolko mangrakbatatna aro dingtang dingtang constituency-rango UDP-ko bilakbatatna dakchakani ong·gnok,” ine UDP West Garo Hills-ni president Ludwig Sangma parakataha.
BJP Tura City District Committee-ni dilgiparang uko BJP-o nokchakjaenga ine matnangenba adita salrangna skangsan John Leslee Sangma, BJP-oni ong·katahachim.
South Tura-ni gitcham MLA John Leslee Sangma, June jani 29 tariko, BJP-ni MLA Sanbor Shullai aro sakgipin MLA AL Hek baksana BJP-ni gipin dilgiparangni mikkango BJP-o napahachim ine nikna man·a.
Indake ong·engon, re·baenggipa 2023 bilsini Assembly election-o ua, Meghalaya a·dokni Chief Minister aro South Tura constituency-ni MLA Conrad K Sangma baksana BJP-ni candidate Bernard Marak baksa South Tura constituency-oni susagrikna siengachim.
