SHILLONG: Ia antini gisepon, People’s Democratic Front (PDF)-ni sakgni aro Hill State People’s Democratic Party (HSPDP)-ni saksako man·chape sakgittam MLA-rang, National People’s Party (NPP)-o napangkuna gita sienga ine kobor on·aha.
Koborko on·ani gitade, PDF-ni MLA sakgni, chong·motan Hamletson Dohling aro Jason S Mawlong baksana Sohiong-ni HSPDP MLA Samlin Malngiang, doltangtangko wate NPP-o napangna gita taritokaha.
PDF-ni Jason S Mawlong January-ni 6 tariko NPP-o napna sienga aro PDF-ni Cabinet Minister Hamletson Dohling, uni salgipino NPP-o napangskana sienga ine kobor on·timgiparang u·iataha.
HSPDP-ni MLA Samlin Malngiang, basako NPP-o napanggen da·o dipet sal somoiko tik ka·kujaenga ineba kobor on·aha.
Ia sakgittam MLA-rang, NPP-o napna skang, Assembly-o membor ong·aoniko watangchenggen.
NPP-o napna sienggipa PDF-ni MLA Dohling-ni parakatani gitade, una chakpaenggipa manderangni ku·pattianio pangchakesa ua NPP-o napangna siengachim.