Ganol Hydro Power Project-ni 7.5 MW Unit-ko CM-ni jakchi oprake on·anga

TURA: 22.5 Mega Watt (MW) Ganol Hydro Power Project-ni 7.5 MW Unit-ko Budbar salo, Meghalaya a·dokni Chief Minister Conrad K Sangma, oprake on·angaha aro ia Power Project-ko oprake on·angani somoio a·dokni Deputy Chief Minister aro Power Minister Prestone Tynsong baksana Health Minister James K Sangma-ba dongpae bak ra·angaha.
Ia Ganol Hydro Electric Project-na 7.5 MW ong·gipa damgittam Turbine-Generator unit-rangko chate, Tura jillani samba jolo donggipa Ganol chiringko jakkalengachim aro ia damgittam Turbine – Generator unit-rangoni damsako Budbar salo a·bachengate, bangki damgni unit-rangkoba da·o re·baenggipa jarango a·bachengatskana manchiengachim.
Ia Ganol Hydro Power Project-ni 7.5 MW unit-ko oprake on·angani somoio a·dokni Chief Minister, tom·anio bak ra·giparangna aganprakengon, indita bilsirangna matchotchipgija dongenggipa project-ko a·dok sorkarini gisiko nange kamko ka·ahani a·selsa da·o chu·sokgipa ong·atna man·aha ine parakataha.
Ia Power Project-ko a·bachengatna man·anichi Garo Hills-na nangdapenggipa bijolirangko on·dapna man·gnok ine janapatengon, ian Garo Hills-ni manderangna gisik ra·beani sal ong·enga ine Sangma parakataha.
Chief Minister-ni parakatani gitade, James Sangma-ni power minister ong·engmiting somoio ua ia project-ko jako ra·piltaienba chu·sokgipa ong·atna krengdilahani a·selsa ia project-ko da·alo chu·sokgipa ong·atna man·ahachim.
Garo Hills-ni ia gong kror 560-na batgipa Ganol Hydro Power Project-ko Meghalaya Power Generation Corporation baksana Mumbai-ni Patel Engineering Limited, Mumbai-ni Civil & HM Contractor Onycon Infra LLP aro Japan a·songni E&M Contractor Toshiba Plant Systems & Services Corporation nangrime rikahachim.
Da·o dipet Meghalaya a·doko 380 MW-mangni gita bijoliko nangengani gimin mikkangchiba sorkari, iandakgipa dal·dalgipa project-rangko ra·bakuna kang·kare kaenga ineba Chief Minister parakataha.