GH-o buring bolgrimrangko tangatpilna OneLife aro GHADC-ni gisepo soi ka·grika

TURA: Garo Hills-o bol wa·arangko skatang den·engani a·sel buring bolgrimrang porongrong ong·tokengahaon, Garo Hills Autonomous District Council (GHADC)-ni bakrimanichi A·chik a·songo buring bolgrimrangko tangatpilna gita OneLife Agricole Pvt Limited company, ja·kurangko de·chakatskaaha.
Garo Hills-o segun bol aro ma·manti sam-bolrangko a·gilsakni gipin a·songrango jakkalenggipa kolrangchi ta·raken tangatpilna gita OneLife-ni official-rang, Budbar salo GHADC-ni Chief Executive Membor (CEM) Albinush R Marak aro Executive Committee-ni Secretary S Ricardo R Marak baksa soi ka·grikangaha aro soi ka·grikanio OneLife-ni gipin official-rang aro GHADC-ni gipin dilgiparangba dongpae bak ra·angtokaha.
Ia project-na GHADC, hectare 15,000 a·arangko on·na miksongenga aro ia kamko a·bachengatna gita OneLife dolni manderang, India a·songonikosan ong·aigija Israel, USA aro South Africa a·songrangni scientist aro agronomist-rangko Garo Hills-ona rimbaskana tik ka·aha.
Ia kamko a·bachengatna gita GHADC baksa songgigrikna man·ahani an·tangni kusi ong·aniko parakatengon, “Mikkangchi gama ge·ani kamrangan manderangna janggi tangani cholrangko on·na man·na gita chinga a·songni salgro salaram jolrango invest ka·na ja·ku de·chakataha. Ian manderangna janggi tangani cholrangko on·anisan ong·aigija samtangtango ong·telaigiparangko tange rakkina dakchakaniba ong·gen,” ine OneLife-ni co-founder Kumar Rajesh parakataha.
Ia gama ge·ani kamrangchi manderangna janggi tangani cholrangko on·na man·na gita uamang, GHADC-ni Chief Forest Officer Rangku N Sangma aro uni office baksa nangrime kam ka·enga ineba OneLife-ni co-founder parakataha.