SWGH-ni political dolrangna bon·kamgipa electoral roll-rangko pakwatata

AMPATI: South West Garo Hills a·jao donggipa damgittam Assembly constituency-rang, chong·motan 53-Ampati (ST), 54-Mahendraganj (ST) aro 55-Salmanpara (ST) Legislative Assembly constituency-ni bon·kame chapa ka·gimin Photo Electoral Roll-rangko Bristibar salo, South West Garo Hills a·jani Deputy Commissioner aro District Election Officer Gideon Kharmawphlang, dingtang dingtang political dolni dilgiparangna pakwate on·ataha.
Ia bon·kamgipa photo electoral roll-rangko, Registration of Electors Rules 1960-o pangchake aro 01.01.2023 tarikko qualifying date dake tariahachim aro ia electoral roll-rangko Bristibar salo, dingtang dingtang political dolni dilgiparangna Ampati-ni DRDA conference hall-o pakwate on·ataha.
Ia electoral roll-rangko pakwate on·atani somoio, South West Garo Hills a·jani ADC aro Electoral Registration Officer-rang, chong·motan AVD Shira, PK Sangma, RZD Shira aro District Administration-ni gipin officer-rangba dongpae bak ra·angaha.
Ia electoral roll-rangko Ampati-o donggipa District Election Office-oniko, Block Development Office-rangoniko aro polling station-tangtangni booth level officer-rangonikoba nie ra·na man·gen ine u·iataha.