SHILLONG: Re·baenggipa February jani gisepo ong·atna sienggipa Meghalaya Legislative Assembly election-o a·dokni dam 52 constituency-rango susana sienggipa Trinamool Congress (TMC)-ni candidate-rangko Sukrobar salo jinmana parakataha.
Ia dam 52 constituency-o susana sienggipa TMC candidate-rangoni sak 7-de da·o ong·enggipa MLA-rang, sak 6-de da·o ong·enggipa MDC-rang aro sak 5-de me·chik candidate-rang ong·enga.
TMC-ni president Charles Pyngrope-ni kobor ra·timgipa manderangna parakatani gitade, ia chang Assembly election-oba a·dokni gitcham chief minister aro Opposition dolni dilgipa Mukul Sangma, constituency damgni, chong·motan Songsak aro Tikrikilla constituency-o susaanggen.
2018 bilsini Assembly election-oba Mukul Sangma, Songsak aro Ampati constituency damgnioni susae ia damgni constituency-on chegipa ong·ahachim indiba ja·mano Ampati constituency-ko ua an·tangni demechik Miani D Shira-na wate on·skaahachim.
Ia chang Assembly election-o ua Tikrikilla constituency-oniba susana siengon, ia constituency-o ua da·o ong·enggipa Tikrikilla-ni MLA aro NPP-ni candidate Jimmy D Sangma baksa susagrikna sienga. 2018 bilsini Assembly election-o Tikrikilla-ni MLA Jimmy Sangma, Congress tikitchi susae seokako man·ahachim indiba ja·mano ua Mukul Sangma aro gipin sak 10 MLA-rang baksa TMC-o napangskaahachim. Iani ja·man ua TMC-ko wate NPP-o napangskaaha aro da·o Assembly election-o NPP-ni candidate ong·e susaskana tariengaha.
Ia election-oba Mukul Sangma, Songsak constituency-oni susataina sienga aro ia chango ua Congress-ni candidate Champion R Sangma aro NPP candidate Nihim D Shira baksa susaskana siengachim.
Indake ong·engon, ia Assembly election-o TMC dol, a·dok gimikni dam 60 constituency-rangon susana miksongengani gimin da·o bangki damchet constituency-rangnaba candidate-rangko bakan parakatgen ine Meghalaya TMC-ni president Charles Pyngrope parakataha.