Mylliem-ni gitcham PDF MLA, NPP-o napa

SHILLONG: Mylliem constituency-ni gitcham PDF MLA Hamletson Dohling, re·anggipa Sonibar salo, National People’s Party (NPP)-o napangaha aro uko NPP-ni national president aro a·dokni Chief Minister Conrad K Sangma baksana NPP-ni national vice president Prestone Tynsong, NPP-ni state president WR Kharlukhi, Cabinet Minister Sniawbhalang Dhar aro gipin dilgiparang NPP-ona rimchaksotokaha.
Dohling baksana PDF-ni adita sak gitcham dilgiparang aro una kam ka·enggipa manderangba apsan salon NPP-o napangtokaha.
Adita salrangna skangsan PDF-ni MLA sakgni, chong·motan Hamletson Dohling aro Jason S Mawlong, NPP-o napna gita Assembly-ni membor ong·aniko watangahachim aro Mawlong-de adita salrangna skangsan NPP-o napangsoahachim.
Dohling aro uni manderangko rimchaksona gita Sonibar salo dingtangmancha jinma tom·bimonganiko Umlyngka kal·chakramo ong·atanio a·dokni Chief Minister aro NPP-ni national president Conrad K Sangma, jinmana aganprakangengon, batanggimin bilsibongana a·dokna kamko ka·anio NPP-chi dilenggipa a·dok sorkari, dingtang dingtang neng·nikanirangko chagrongna nangaha indiba ku·cholsan bakrime kamko ka·anichi a·dokna bang·en kamrangko chu·sokate on·na man·aha ine parakataha.
Ia tom·anio NPP-ni gital membor Hamletson Dohling-ba jinmana aganprakengon, manderangni nangnikenggipa dingtang dingtang kamrang, jekai ILP, Khasi aro Garo ku·sikrangko Constitution-ni Eighth Schedule-o napatani aro uandakgipa kamrangna ku·rangko on·e krengdilengani gimin a·dokni Chief Minister Conrad Sangma-ko mittelpilangaha.
Ia tom·bimonganio Dohling-ko Mylliem constituency-na NPP-ni candidate dakeba parakatjolaha.