TURA: Sonibar salo, 43 Battalion BSF aro Meghalaya Police-ni sipairang, gong lak 24-mangni kg 11,000 ong·gipa gue granrangko Bangladesh-oniko India a·songona ra·srukbaengmiting somoio rim·na man·aha.
BSF aro Meghalaya Police-rang, South Garo Hills a·jani Rongara police station-ni ning·o donggipa Dambuk Apal jolo sandianirangko dakengmiting somoio ia guerangko rim·sona man·aha.
BSF official-rangni u·iatani gitade, ia gue granrangko truck bolgittamo Bangladesh a·songoniko salbaengachim aro ua biapo sipairangko niksoon, ia truck gariko salbaenggipa manderang, truck garirangko gale ua biaponi kataha.
Iandake, sima jolrango niam gri kam ka·enggipa manderangko rim·na dakchakahani gimin BSF Meghalaya Frontier-ni official-rang, Meghalaya Police-ko mittelpilataha aro mikkangchiba ia sima jolrango iandake ong·gija kamrangko rim·na gita nangrime kamrangko ka·angkugen ine parakataha.
