TURA: Meghalaya a·dokni Chief Minister Conrad K Sangma-ni dakmike mesokenggipa kamrangna North Garo Hills a·jani manderang, jagnini gisepon aganchakaniko on·skagen ine Mongolbar salo, Trinamool Congress (TMC)-ni dilgipa aro Rongrong MDC Rinaldo K Sangma parakataha.
Sangma-ni parakatani gitade, North Garo Hills a·jao rika matchotkugijagipa stadium-rangko kulidrae on·ani aro metre 100 ong·gipa ramako baditaba somoirangni gisepo black topping on·e tarianirangara chief minister-ni manderangna dakmike mesokenggipa kamrangsa ong·engachim.
“Da·o election-ni somoio manderangna iandakgipa kamrangko dakmesokaniara indinsa ong·aigen maina ia ramako North Garo Hills aro Resubelpara-ni manderang sarikkitan re·ruraenga. Damra-Resubelpara-Bajengdoba ramako 2019 bilsion tarina a·bachengatahaoba da·onan maming dingtanganiko nikna man·kujaenga aro ia rama tarianiko ta·rakatchina dingtang dingtang dolrang, changni chang sorkariko gisik ra·atahaoba da·onan kamrang apsane dongaienga. Iandakgipa kamrangna North Garo Hills a·jani manderang da·o election-ni somoio aganchakaniko on·chongmotgen,” ine TMC MDC Rinaldo Sangma parakataha.
Adokgre songni Chenanggre Stadium aro Bajengdoba-ni Hamilton Stadium-ko re·anggipa Sombar salo Chief Minister kulie on·angahachim ine nikna man·a.
Gajing Bibra ramani bakko tariani bidingo chief minister-ni social media-o parakgipani gimin janapatengon, ia ramako uni Resubelpara-ona sokbana baditaba konta skangmangmangsa tariahachim ine Rinaldo parakataha.
Resubelpara-Gajing-Mendipathar ramara office, skul aro dingtang dingtang kamrangchi re·ruraenggipa manderangna mongsonggipa rama ong·achim ine janapatengon, iandake manderangna dakmesoke roaigija rama tarienggipa contractor-rangko ta·rake tarina ge·etchina gita Sangma, chief minister-ko didiataha.