SHILLONG: Meghalaya a·doko Bharatiya Janata Party (BJP)-ni mingsing minggamrorobaengako nike, Trinamool Congress (TMC), Indian National Congress (INC) aro gipin political dolrang kenjagokna a·bachengtokenga ine Budbar salo Meghalaya BJP-ni dilgiparang parakataha.
BJP-ni kosako mamingkoba matnangna man·jae ia political dolrang, BJP-ni kosako tol·e matnanganirangko dakani cholrang dongenga ineba BJP-ni dilgiparang parakataha.
“Meghalaya a·doko gital sorkariko rikna BJP-ni a·kangani ja·man adita salrangna skangsan, Congress dolni dilgipa Vincent Pala aro TMC-ni dilgipa Mukul Sangma, BJP-ni kosako kragijagipa kattarangko aganchakaha aro ian ia dolrangni kengokenganiko mesokani ong·enga. Uni gimin da·aloba chinga iakon agantaigen, Meghalaya Assembly election-ni ja·man BJP gride darangba sorkariko rikna man·jawa,” ine BJP Meghalaya-ni ku·wattimgipa M Kharkrang parakataha.
Kharkrang-ni parakatani gitade, iako BJP-sa aganenga ong·ja indiba ian a·doko ong·enggipa chong·mot kattasa ong·achim.
“Da·o jagnini gisepon a·dokni manderang, BJP-chi dilnagipa sorkariko seokna siengaha aro iani bidingo Mukul Sangma ba Vincent Pala-ni agangipa kattarangde manderangni gisikko dingtangatna man·jawaha. Ma·mongo aro dingtang dingtang a·dokrango BJP sorkarini kamrangko Meghalaya a·dokni manderangba nikmanaha,” ine Meghalaya BJP-ni ku·wattimgipa parakataha.
Kharkrang-ni parakani gitade, BJP dolmangmangsan ku·rachaka gita kamrangko chu·sokate on·gipa dol ong·e ine Meghalaya a·dokni manderang nikengahani gimin Meghalaya a·dokoba apsan daken tom·tomani aro namroro silroroaniko nangnike BJP sorkariko nangniktokenga.
“Gipin political dolrang, BJP-ni kosako tol·e matnanganirangko dakna jotton ka·angkugen indiba BJP-ni kosako matnanganirangara gimikan pangchakani gri tol·e matnanganirangsan ong·aigen. Uamangni iandakgipa cha·chippilgipa kamrang chu·sokjahaon uamang an·tangtangni matnangronggipa kamonan sokpilaigen. Iandakgipa matnanganirang maming dakeba BJP-ko ia election-o ga·akatna man·jawaha,” ine Kharkrang parakataha.