TURA: North Tura-ni gitcham Congress MLA Noverfield R Marak, Bristibar salo, North Tura-ni sakgipin candidate Adamkid A Sangma baksa Bharatiya Janata Party (BJP)-o napangaha.
Ia chang Assembly election-o Congress dolni gitcham MLA Noverfield Marak, Trinamool Congress (TMC)-ni tikitchi North Tura constituency-o susataina miksongengachim indiba North Tura constituency-ni TMC-ni tikitko Tura-ni gitcham MDC Rupert M Sangma-na on·skaahani gimin ua BJP-o napangskaaha.
Congress dolni gitcham MLA Noverfield Marak, 2013 bilsio North Tura constituency-ni MLA-na seokako man·ahachim indiba 2018 bilsio ua NPP-ni candidate Thomas A Sangma-ni jako amako man·rikskaahachim.
BJP-o napanggipa sakgipin candidate Adamkid A Sangma-ba 2013 aro 2018 bilsini Assembly election-rango Independent candidate ong·e susaahachim indiba changgnion ua chu·sokgipa ong·na man·jahachim.
Ia 2023 bilsini Assembly election-o Adamkid, TMC-ni tikitchi apsan constituency-on susana miksongahachim indiba ua TMC-ni tikitko man·rikjahani gimin da·o BJP-o napangskaaha.
