SHILLONG: Delhi-oni Shillong-ona aro Shillong-oni Delhi-ona dake sildoreng bilruraataniko a·bachengatna gita re·anggipa Sonibar salo, a·dok sorkarini Meghalaya Transport Corporation (MTC), SpiceJet baksa songgigrikanio soi ka·grikangaha.
Delhi aro Shillong songjinmani gisepo sildoreng bilruraatna gita a·dok sorkari, 2020 bilsion manchienba iana Big Charter Pvt Limited (FlyBig) company baksa songgigrikchengahachim indiba ja·mano FlyBig company, ia kamko jako ra·na man·jae a·dok sorkari baksa songgigrikaniko den·galpilna nangahachim.
Iani ja·mano Delhi aro Shillong songjinmani gisepo sildoreng bilruraatna gita skaniko SpiceJet company, Meghalaya sorkarina parakatskaaha aro uandaken da·o MTC aro SpiceJet-ni gisepo songgigrike soi ka·grikangaha.
Koborko on·ani gitade, SpiceJet company-o bol 23 Bombardier Dash 8 Q400 aircraft-rang donga aro ia apsan sildorengkon Delhi-oni Shillong-onaba re·baenggipa February ja dipet bilruraatna miksongenga.
TMC aro Spicejet official-rangni soi ka·grikani somoio a·dokni Chief Minister Conrad Sangma-ba dongpaaha.