SHILLONG: Meghalaya Assembly election-na skang, Bharatiya Janata Party (BJP)-ni ‘Vistarak’ ba party-ko giproroatna kam ka·enggipa manderangni kamo kusi ong·nikjaengani gimin ia antini a·bachengachibara, Meghalaya BJP-ni dilgiparang tom·e chanchirimangaha.
Ia ‘Vistarak’-rangara, Meghalaya a·doko BJP-ko dakchakna aro a·dokni dingtang dingtang biaprango mandal committee aro booth level committee songanirangko nirokchina dongimin manderangsa ong·achim indiba ia Visatarak-rang, mandal committee-rangoba dongpaenga aro pandal-rangoba asongna biaprangko man·pae, jinmana aganprakanirango bak ra·parongenga ine nikna man·ahachim.
Koborko on·ani gitade, uamangni iandake kamko ka·ani aro an·tangtangko election-ni in-charge ine a·kanganiara jegalna kragipa kam ong·engachim.
BJP-ni core committee tom·anio ra·gipa resolution-o parakani gitade, ia Vistarak-rang, BJP-oni susana sikenggipa mitam manderangnaba tikitrangko on·na ku·rachakaha aro mitam candidate-rangnade election-ni somoio tangka paisarangko dakchake on·naba ku·rachakahachim.
Indake ong·engon, uamangni iandakgipa kamrangko nike, Vistarak-rangna aro mongsongbate me·chikrangna an·tangtangni biapon kamtangtangko ka·e dongchina mikrakataniko on·gen ine BJP-ni core committee, tik ka·e donangaha.
Meghalaya a·dokni mitam biaprango aro mongsongbate songadam nokadamrango Khasi aro A·chik ong·gijagipa Vistarak-rang kamko ka·engani a·sel, manderangni gisepo ong·gija chanchianirang ong·katenga ineba ia biaprango donggipa gipin jat Vistarak-rangko ra·galchinaba BJP-ni core committee tik ka·angaha.