SHILLONG: Dingtang dingtang dolrang baksa ‘chonnikgrikanina’ aro ‘matnangrikanina’ doltangni kamo kusi ong·jaenba, ia Assembly election-o Pynthorumkhrah constituency-oni susana gita seokako man·gipa Trinamool Congress (TMC)-ni candidate Samborlang Diengdoh, doloni ong·katpilaha.
Koborko on·ani gitade Diengdoh, re·anggipa Sonibar salon, sakgipin dilgipa Banpynshngain Rumnong baksa TMC-oni ong·kataha.
An·tangni TMC-oni ong·katani gimin talataniko on·angengon, “Chinga saksa sakgipinko chonnikgrikaoni chel·e dongna sikgipa aro nama bewalosa kamko ka·na sikgipa ong·ani gimin TMC-oni ong·kataha,” ine Diengdoh parakataha.
Ia election-o ua Independent candidate ong·e susaangskagen ine parakatengon, batanggimin somoirango uni campaign ka·anirangoba ua an·tangko TMC-ni candidate ine campaign-ko ka·jaha indiba dingtangniko ra·bana sikenggipa inesan campaign ka·aiaha ine Diengdoh parakataha.
Re·baenggipa February-ni 27 tariko ong·atna sienggipa Meghalaya Assembly election-o susana gita TMC-ni sak 52 candidate-rangko re·anggipa January 6 tariko parakatmanahachim aro TMC-ni candidate-rangko parakanio Diengdoh-koba Pynthorumkhrah constituency-ni candidate-na mingahachim.