Williamnagar: Gitcham Minister, working president aro Williamnagar constituency-ni Congress candidate Deborah Marak, re·baenggipa assembly election-o constituency-tango chena ka·dongasan ong·aija uni party, Garo Hills-o ge 10 seat-rangko chetelgen ine ka·dongbee aganaha.
Marak, jean re·anggipa adita jarangoni uni constituency-o dingchikbee campaign ka·enga, Congress-o neng·nikanirangko chagronggenchimoba party changsatai sasonni bilona sokbataina ka·dongenga.
“Chinga party-ko rikpiltaienga aro namen dakenga. Chingo ongipa gadangonin party worker-rang, chingni BCC-ni, DCC-ni aro PCC worker-rang donga, uamang gimatgimin somoiko kolgapatna raken kamrangko ka·enga. Chinga komibeoba ge 10 seat-rangko re·baenggipa election-o chena ka·dongenga. Chingni tarisoanirang da·o tikan ong·enga. Garo Hills-ni ge 24 seat gimikkode Congress chegopja inen u·ia, unigimin chingni ka·dongsoaniko chinga kakketkon ku·rachaka,” Deborah aganaha.
Election-o an·tangni chetaina ka·dongani gimin aganengon, chena ka·dongani gride ua election-on susajawa ine Congress dilgipa aganaha. Indake ong·genchimoba, NPP-ni Marcuise Marak aro TMC-ni Alphonsiush Marak mang baksa dakgrikna nanggen ine Marak aganaha.
Salantion una chakgipa sokbadapdapenga ine aganengon, indakgiparangchi Congress worker-rang Williamnagar-o namen didiatako man·enga, ua agandapaha.
“Chinga salantian NPP aro TMC-oni re·bagipa party worker-rangni chakpaaniko man·enga. Uamang angna chakpaasan ong·aija, angni campaign-ona bang·bata manderangko chimongbana gitaba angna ku·chakaha ine congress dilgipa aganaha.
NPP MLA-ni kamrangni bidingo aganengon, Marcuise constituency-na maming gital kamko ka·dapa dongja ine Marak aganaha.
“Williamnagar constituency-o chu·sokatna nanggipa kamrang bang·en dongenga, jenan mingsa list-ko tarina nangenga. Education-o namemanchan kam ka·na nangenga, unagre, chadamberang kamgri dongenga, manderang tangkagri dongenga, indie bano development. Angni somoio, ge 100 tuchakani a·dam gnanggipa Civil Hospital-ko Williamnagar-ona ra·baaha, uasan ong·aigija gipin nokrik-nokdakanirangkoba ra·baaha,” ua parake aganaha.
Kusimikolgre aro Warima jolo donggiparang baksa land settlement-ko NPP-ni dakani gimin Deborah, Conrad Sangma-ni re·dilgipa sorkari mittelaha indiba ia pilak kamrangko uni somoion a·bachengataha ine ua aganaha.
“Uamang kamni bon·kamgipa bakkosan ka·aha indiba ja·pang ja·dilko ma·sigipa manderangde amikkani a·bachengatgipa kamsa ine angko ma·sigen,” Deborah a·kange aganaha.
