TURA: South Tura constituency gimikna campaign-ko ka·na gita mijal Sombar salni bako, National People’s Party (NPP)-ni tom·bimonganiko New Tura kal·chakramo ong·atangaha aro ia tom·bimonganio a·dokni Chief Minister aro NPP-ni national president Conrad K Sangma, jinmana aganprakengon, batanggimin bilsi bongani gisepo NPP-chi dilenggipa MDA sorkarini chu·sokatgipa kamrangni gimin jinmana agan-talate on·angaha.
Batanggimin bilsi bongani gisepo NPP sorkarini chu·sokate on·anggipa kamrangna mittelpile aganangengon, mongsongbate MGNREGS aro Jal Jeevan Mission-ni kamrangko ia sorkari tang·doatna man·ahani gimin ma·mong sorkarini mittelpilaniko man·aha ine Sangma parakataha.
“2018 bilsiona kingking MGNREGS-ni ning·o Meghalaya a·dokna gong crore 500-mangkosan chamataiachim indiba NPP-ni dilanichi sorkariko chalaia intalan kamrangko name niroke chu·sokatahani gimin ia scheme-na ma·mong sorkari, gong crore 1800-mangko chamataha,” ine Chief Minister aganaha.
Sangma-ni parakatani gitade, 2018 bilsina skang MGNREGS-ni kamo Meghalaya a·dok ja·manchakbatsranggipa a·dokrangoni damsa ong·kuengachim indiba batanggimin bilsi bongani gisepo Meghalaya a·dokba MGNREGS-ni kamo nambatsranggipa a·dokrangoni damsa ong·ahachim.
JJM-ni kamrangko chu·sokatani gimin janapatskaengon, ia scheme-ni ning·o kamrangko name chu·sokatahani a·sel Meghalaya a·dok gipin a·dokrangna dakmesokgipa a·dok ong·skaengaha ine Chief Minister parakataha.
“Union Jal Shakti Minister Rajendra Shekhawat-ni Shillong-ona re·baani somoioba JJM-ni kamna Meghalaya a·dokko daksningchina gita gipin a·dokrangko didiangaha,” ine Sangma aganaha.
Meghalaya a·doko dingtanganiko nikengahani gimin ma·mong sorkariba mittelpilrongenga ineba Chief Minister parakataha.
“Skangode Meghalaya a·dokna chamatenggipa tangka paisarangko jakkalna changjaenga inesa ma·mong sorkari ma·siachim indiba da·ode Meghalaya a·doko namroro silroroaniko nikengani giminsa uamang aganskaengaha. Ian Meghalaya a·dokna tang·doaniko ra·baani ong·enga,” ine ua aganaha.
“Meghalaya a·dokko dakmesokgipa a·dok ong·atanian chingni jumang ong·enga aro a·songo nambatsranggipa a·dokrang baksa apsan ong·atanian ong·enga,” ine Sangma aganaha.
Ia tom·bimonganio South Tura constituency gimikoni NPP-na chakpaenggipa manderangoni sak 5000-mangni gita bakko ra·angtokahachim.
