SHILLONG: Meghalaya Assembly election-na skang dingtang dingtang political dolrangni gisepo susagrikani aro matnanggrikanirangko nikna man·engon, ia election-o susana sienggipa dilgipa sakgni doltangtangoni ong·kataha ine kobor on·aha.
Koborko on·ani gitade, ia election-o Ranikor constituency-oni susana parakatgimin National People’s Party (NPP)-ni candidate Martin M Danggo, Bharatiya Janata Party (BJP)-oni susaskana gita NPP-oni ong·kataha.
Apsan daken, Dadenggre constituency-o susana gita parakatgimin Congress candidate Augustine D Marak-ba da·o election-na skang Congress doloni ong·kataha ine kobor on·aha.
Koborko on·ani gitade, ia Assembly election-o Trinamool Congress (TMC)-ni candidate Rupa Marak-na chakpaaniko on·skana gita Augustine Marak, Congress doloni ong·kataha.
Dadenggre constituency-o TMC-ni Rupa Marak, NPP-ni James K Sangma baksa susana siengachim.
Congress doloni ong·katanggipa Augustine D Marak, Meghalaya Pradesh Congress Committee (MPCC)-ni vice president-ba ong·engachim ine nikna man·a.
Indake ong·engon, NPP-oni ong·katanggipa Martin Danggo, adita salrangna skang, Assam-ni Chief Minister aro BJP-ni dilgipa Himanta Biswa Sarma-ko Guwahati-o grongani ja·man, ia election-o BJP-oni susaskana gita NPP-oni ong·kataha ine kobor on·timgiparang parakataha.
Danggo-ni Sarma-ko grongani somoio Meghalaya a·dokni BJP MLA AL Hek-ba dongpaahachim ine kobor on·aha.