SHILLONG: Nokdang politics-kon ja·rikkuenga gita dake abisa sakgni NPP candidate-rang, Ampareen Lyngdoh East Shillong seat-na susana aro Jasmine Lyngdoh Nongthymmai seat-o susana gita, mijalo nomination file ka·ani skanggipa salon DC office nomination file ka·angaha.
Ampareen Lyngdoh, Returning Officer, SS Syiemlieh-ni mikkango nomination file ka·engon, uni nogipa Jasmine Lyngdoh , Returning Officer, RS Manners-ni mikkango DC office-o nomination file ka·angaha.
Nomination file ka·tokani ja·man, koborni manderangna aganengon, Uni kosako CBI case ba mamla segatgipa election-ni a·bao uni kosako maming nangchakejawa ine Ampareen Lyngdoh aganaha.
“Iani bidingo agangrikanirangko dakmanaha aro anga a·songni judiciary system-o namen ka·donga, da·o dipetnade anga dosi gri ong·enga, aro iachi angni election-o susaanio maming nangchakeani dongjawa,” Lyngdoh aganaha.
Uni bongagipa changna MLA ong·na krenganio, uni kosako chakatgiparangni bidingo aganengon, una chakgiparang ongipa gadangonin bang·sa bang·roroenga aro uni pilak program aro policy-rangko dakanioba manderang chakpaaniko on·enga ineba Lyngdoh aganaha.
NPP-ko maina baseaha ine sing·on, Lyngdoh indake aganaha je NPP, ian a·dongni ong·e a·songni bimango ong·gipa party ong·a aro NPP-ni chanchianirang Congress gitan apananga.
“NPP, communal party ong·ja, jekon ongipa politics-oni bebera·na man·a,’’ ua aganaha.
Minggipin, da·omitingo Nongthymmai-ni legislator ong·enggipa manderangni ka·dongsoani gita kamrangko chu·sokatna bilsokja aro bang·a kamrangko ka·gija galchipenga ine Jasmine M Lyngdoh matnange aganaha.
Uni kosako suaenggipako tusienggipa dal·gipa bimang ine matnange aganenba, dal·gipa bimangni tusiengmitingo ua an·tangna chol dakenga ine Lyngdoh aganaha.
Ampareen mang abisa sakgnian NPP-ni bang·a chakgiparang baksa DC Office-ona nomination file ka·na re·baaha.
