SHILLONG: Re·baenggipa February-ni 27 tariko ong·atenggipa Assembly election-na dingtang dingtang political dolrang, an·tangtangni chu·sokatna miksongenggipa kamrangko segatgimin ‘election manifesto’-rangko parakattokengahaon, Meghalaya a·dokni Bharatiya Janata Party (BJP)-ba election manifesto-na manderangni ku·pattie on·anirangko ra·na gita dingtangmancha ‘collection drive’-ko a·bachengataha ine u·iataha.
BJP Meghalaya media department-oni parakatani gitade, a·doko songdongenggipa manderangni nangnikanirangko BJP-ni election manifesto-o segatna man·na gita dingtangmancha ia collection drive-ko ong·atenga.
“Meghalaya a·doko songdongenggipa manderangni salantio chagrongna nangenggipa asol neng·nikanirangkosa chinga BJP-o namatna nangnikenga aro iana chinga manderangni ku·rang on·aniko nangenga. A·doko ong·enggipa obostarangkode manderangsa nambate ma·sia aro uamangsa an·tangtangni nanganirangkode ma·sienga. Uni gimin a·dokni manderang an·tangtangan chingni election manifesto-ko sechina chinga nangnikenga,” ine BJP Meghalaya-ni dilgiparang parakataha.
BJP Meghalaya-ni election manifesto-na ku·pattianirangko on·na gita 836 000 6060 nombor-ona miss call on·ate ba www.mpowermeghalaya.com
“Indita bilsirangna Meghalaya a·doko dingtang dingtang dolrang aro dilgiparang, an·tangtangni skani gita sason ka·aha aro manderangni nanganirangkode nichanggalaha. Uni gimin da·o mikkang bilsi bongade BJP-ni ning·o dingtanganiko nikna siengaha aro pilak sorkari dilgiparang aro officer-rangba Meghalaya a·dokni pilak kona noksikrango songdongenggipa manderangna uamangni nangani krisa kamrangko ka·gnok,” ine BJP Meghalaya parakataha.