SHILLONG: Ia bilsio United Democratic Party (UDP), gipin political dolrang baksa bakrimgija doltangari sorkariko rikna krenggen Mongolbar salo, UDP-ni working president Paul Lyngdoh parakataha.
Re·baenggipa February-ni 27 tariko ong·atenggipa Meghalaya Legislative Assembly election-o West Shillong constituency-oni susana gita Lyngdoh, Mongolbar salo an·tangni nomination-ko file ka·angani ja·man, ia kattarangko kobor ra·timgiparangna aganaha.
Lyngdoh-ni parakatani gitade, ia Assembly election-ni ja·man uamang, BJP aro NPP dolrang baksa bakrime sorkariko rikna nangnikjaengani gimin a·dokni bang·bata seat-rangkon chena krengenga.
Ia chang Assembly election-o seat-rangko bang·bate chegenchimode gital sorkariko rikanio United Democratic Party (UDP)-ni chief minister ong·ani cholrang donga ine Sombar salosan, UDP-ni general secretary Jemino Mawthoh-ba parakatahachim.
Ia chang a·dokni manderang NPP aro TMC-ko ra·chaktokjaengani gimin uamang bang·bate seat-rangko chena ka·dongenga ineba Mawthoh parakatahachim.
“Chinga bang·bate seat-rangko chena man·jagenchimoba sorkariko dilna man·na gita dolsanchi dal·batgipa party ong·na nangnikenga,” ine UDP-ni general secretary aganaha.
