TURA: South Tura constituency-ara a·dokni chief minister Conrad K Sangma-ni constituency ong·genchimoba ia election-o ua uko chena man·aigen ine Mongolbar salo, South Tura constituency-ni Bharatiya Janata Party (BJP) candidate aro Tura-ni MDC Bernard N Marak, an·tangni ka·dongchakenganiko parakataha.
Nomination file ka·ani bon·kamgipa salo, BJP-ni candidate, DC office-o an·tangni nomination-ko file ka·angani ja·man iako kobor ra·timgiparangna parakataha.
“South Tura-o CM chepiltaigen ine manderangni gisepo agananirangko knasona man·enga indiba ian bilake susana sienggipa election ong·enga aro anga ia susaanio chegipa ong·na namen ka·dongenga,” ine Marak parakataha.
Meghalaya a·dokna aro mongsongbate South Tura constituency-na namroro silroroaniko ra·baaha ine NPP-ni a·kangenggipani gimin janapatengon, NPP sorkarini a·kangenggipa Smart Town, PA Sangma Stadium, Ganol Hydro Project aro uandakgipa dingtang dingtang project-rangara ma·mong sorkarini chamatgipa project-rangsa ong·a ine BJP-ni state vice president parakataha.
“Ia kamrangna an·chingni Prime Minister Narendra Modi-sa rasong on·ako man·na nanga aro chief minister-de ong·jachim. Indiba chief minister an·tangsa ia kamrangna an·tang rasongko a·kangskaenga. Ian namen ong·ja aro iako manderang ma·sija ong·ja. Chief Minister-ni a·bachengatgipa project-rangde dongan dongja,” ine Marak aganaha.
Assam-o Kristianrangni kosako kamrangko ka·enggipani gimin janapatengon, Meghalaya a·dokode iandakgipa kamrangna kenna nangani dongja ine Tura-ni MDC parakataha.
“Meghalaya a·doko bang·bata candidate-rangan Kristianrangsa ong·a aro chinga iandakgipa obostarangko an·chingni a·doko ong·na on·jawa. Iandakgipa a·selrang gipin a·dokrango ong·genchimode chinga BJP MLA-rang, jinma apsan ku·rangko on·gen,” ine Marak parakataha.
Uko Tura police-rangni rim·anichi election-na maiba nangchakeanirang donggenma ine sing·on, ia a·selchi uni susaanio maming nangchakeanirang dongjawa ine Marak parakataha.
“Angko tol·esa rim·aha aro angni kosako tol·gipa case-rangko ka·aha ine manderang ma·sitoka. Ua (chief minister) an·tangni political career-na kenchaksoesa angni kosako iandakgipa ja·kurangko de·aha. Angni kosako matnange case ka·gipa pilakkon kachari kema ka·e angna jaminko on·aha,” ine South Tura-ni BJP candidate parakataha.
