TURA: International Year of Millets 2023-ko maniani bidingo adita salrangna skang, NABARD-ni gita South Garo Hills a·jani KVK baksa nangrime district level workshop-ko Chokpot-o donggipa KVK office-o ong·atangaha.
Ia program-ko ong·atanio NABARD-ni DDM Khelchandra Chongtham, jinmana aganprakengon, a·songo migom man·aniko aro cha·aniko bariatani bidingo gipatna gita India sorkarini proposal-ko man·e United Nations, ia 2023 bilsiko International Year of Millet ine parakmanaha ine talatangaha. Migomara mandena namgipa cha·ani ong·a ine janapatengon, migomna chirangkoba bang·e nangjani gimin ian samtangtango ong·telaigiparangnaba namgniko on·a ine Chongtham parakataha.
Ia workshop-ko ong·atanio South Garo Hills KVK-ni Senior Scientist aro Head, Dr Athokpam Haribhushan-ba jinmana aganprakengon, ia 2023 bilsio KVK-ni gita jako ra·e kam ka·na sienggipa dingtang dingtang project aro scheme-rangni gimin talataniko on·angaha.
South Garo Hills a·jao migom ge·aniko bariatna gita cholko ra·e rakbate kamko ka·china gitaba ua a·jani game ge·e cha·giparangko didiangaha.
Ia workshop-ko ong·atanio dongpae jinmana aganprakanggipa gipin manderangara, Chokpot-ni ADO Aiarson K Sangma, SBI Chokpot Branch-ni branch manager Sidharta Waikhom, SGH KVK-ni SMS (Agronomy) Rike Chelchak A Sangma, SGH KVK-ni SMS (Plant Protection) Dr Tanya R Marak aro gipinrang ong·a.
