TURA: Re·baenggipa February-ni 27 tariko Meghalaya Legislative Assembly election-ko ong·atengon, election-ni somoio tangka paisarangko jakkalani aro koros ka·ani bidingo dingtang dingtang political dolrangna, susaenggipa candidate-rangna aro election agent-rangna Sonibar salo, Central Expenditure Observer-rang, Tura-ni DRDA Conference Hall-o agan-talate on·angaha.
Election Commission of India (ECI)-ni dongimin niam gita election-ni somoio tangka paisarangko koros ka·ani bidingo ECI-ni songe watatgipa Expenditure Observer-rang ia tom·anio, dingtang dingtang political dolrangna, susaenggipa candidate-rangna aro election agent-rangna agan-talate on·angaha.
Ia agangrikani program-ko English ku·sik baksana Garo aro Hindi ku·sikrangchiba ong·atangaha, jeon dingtang dingtang political dolni dilgiparang aro susaenggipa candidate-rangni agent-rang, an·tangtangni ma·sigijanirangko sing·sandienba ma·sie ra·na gita cholko man·aha.
ECI-ni dongimin niam gita koros ka·ani hisaprangko name rakkichina gitaba ia tom·anio Expenditure Observer-rang, political dolrangko aro susaenggipa candidate-rangko didiangaha.
Constituency-tangtango report ka·na nanganirang donggenchimode Voters Helpline no. 1950 aro cVigil app-ko jakkalchina gitaba Expenditure Observer-rang didiangaha.
