TURA: Budbar salo, National People’s Party (NPP)-ni national president Conrad K Sangma, Bajengdoba constituency-ni ning·o donggipa Gabil songona re·ange, NPP-ni candidate Pongseng Marak-na campaign ka·angaha.
Ia tom·bimonganiko ong·atanio ua jinmana aganprakangengon, NPP-ni balwarang bilake balengani giminsa a·dokni pilak biaprangon dingtang dingtang political dolni manderang NPP-o naptokenga aro ia election-o NPP, bang·bata seat-rangkon chegopna siengani gimin gipin dolni candidate-rangna pu·one maming namgnirang dongjawa ine aganangaha.
“Na·simangni MLA Pongseng Marak, Bajengdoba constituency-o namroro silroroniko ra·bana sorkari baksa agangrikjringenba rakbee kamrangko ka·aha. Ua constituenc-tangni manderangna ka·saani gimin an·tangni bil ama gita kamko ka·aha aro ia changoba ua seokako man·taigenchimode, an·tangni constituency-na aro an·tangni manderangna kamrangko ka·angkugen,” ine Sangma aganaha.
NPP-ni candidate-na pu·one NPP-ko aro Pongseng Marak-ko bilakbatatchina gitaba ua manderangko didiangaha.
FOCUS aro FOCUS Plus program-ni bidingo talataniko on·angengon, ia scheme-ko a·bachengatanichi game ge·e cha·gipa nokdangrang aro Producer Group-rang, an·tangtangni gama ge·ani aro gipin janggi tangani cholrangko a·bachengatna gita gong lak 1-mangni gita tangkarangko man·aha ine NPP-ni national president parakataha.
A·doko game ge·e cha·enggipa manderangni namgnina NPP sorkari, mikkangchiba ia scheme-ko on·angkuna miksongenga ineba Sangma aganaha.
TMC-ni WE Card aro MYE Card scheme-rangara a·dokni manderangko togigipa scheme-rangsa ong·a maina uamang manderangni account-rangko ra·chenggijasa bimingrangko segatenga ineba Sangma matnangataha.
“NPP-ni bilakbaenganiko nike TMC, togigipa scheme-rangko manderangna ku·rachakenga. Uamang chingni scheme-rangko daksningna jotton ka·ahachim indiba chu·sokgipa ong·jaha,” ine ua aganaha.
