SHILLONG: Meghalaya a·doko Inner Line Permit (ILP)-ko ra·gatanichi, tourism-na nangchakeaniko ra·bae, gipin biaprangoni re·baenggipa manderangna neng·nikanirangko ra·banaba gnang ine Budbar salo, Bharatiya Janata Party (BJP)-ni national secretary Rituraj Sinha talataniko on·angenba, BJP dolni gita ILP-ko ra·gatani bidingo chanchina skang pilak dolrangni nangnikanirangkoba nichengna nanggen ine parakataha.
Maini gimin BJP-ni election manifesto-o ILP-ni giminde mamingkoba janapjaha ine sing·anina aganchakaniko on·angengon, “ILP-ara pilak dolrang baksa chanchie ja·ku de·na nanggipa kamsa ong·a maina ILP-ni gimin manderangni gisepo jera ra·grikanirang donga aro chinga bebera·a iani ning·o maiba nangchongmotgipa a·sel dongengnaba gnang. Indiba Meghalaya a·dokni namroro silroroanikode Tourism-chin tang·doatna nanga aro ILP-ode rakgipa niamrang dongani gimin tourism-na nangchakeanirang dongskagen. Tourism-na nangchakeanirang donggenchimode gipin biaprangoni re·baenggipa manderang neng·nikanirangko man·skana nanggnok aro Meghalaya a·doko namroro silroroaniko champengani gita ong·skagnok,” ine Budbar salo Sinha, kobor ra·timgiparangna aganaha.
“ILP-ni bidingo chanchibewalna nangenga aro election-ni ja·mano chinga dingtang dingtang dolrang baksa agangrikchongmotgen. Assembly-o chingo chu·onga gita MLA-rang donggenchimode jera ra·grikaniko dake ja·mano ILP-ko ra·gatani bidingo chanchina man·naba gnang,” ineba BJP-ni national secretary aganaha.
“Chingna sak 31 MLA-rangko on·genchimode chinga ILP-ko on·gen,” ine batanggimin somoirango South Shillong-ni BJP MLA Sanbor Shullai, changni chang aganskaahachim ine nikna man·a.
Indake ong·engon, Congress dolna on·gipa vote ge·prakan indin nisigalanisan ong·aigen ineba BJP-ni national president matnangataha.
“Congress dolara sorkarini bak ong·pana sienggipa dol ong·jani gimin bilsi bongana opposition-osa asongna nangaigen aro uamang constituency-tangni manderangna maming namgnirangko ra·bana man·jawa,” ine Sinha aganaha.
Apsan daken ua Trinamool Congress (TMC) dolkoba matnangataha aro TMC dolara ia chang election-o Meghalaya a·doko rona re·bagipa dol gitasan ong·aia ine parakataha.
“2018 bilsiode TMC dongjachim aro da·alode uamang a·dok gimiko re·rame campaign-rangko ka·tokenga. Anga Meghalaya a·doko songdongenggipa pilak manderangon sing·na sikenga, ia dolrang 2028 bilsini election-oba dongtaigenma, iako darangba aganna man·ja maina uamang election tourism-nasa Meghalaya-ona re·baaha,” ine BJP-ni national secretary parakataha.