WILLIAMNAGAR: Social media-o EVM-ko kal·aka ba togiani bidingo gipanggipa video-ni gimin talataniko on·atengon, East Garo Hills-ni Deputy Commissioner Jagdish Chelani, jinmana notice-ko on·ataha, jeon manderangko kakket ong·gija koborrangko gipatjachina mol·molataha aro jemangan beng·ako manija niam pe·giparangni kosako ja·ku de·na mikrakataha.
Deputy Commissioner-ni talatani gita, EVM ba election-o vote puona jakkalgipa machine-ko togina ba kal·akna man·ja, machine-ko kal·akna man·a ine social media-o gipgipa video kakket on g·ja, EVM-ko chelchakgipa dolrangni nirokaniko dona.
EVM-ko draft ka·mitingo machine-ko changni chang check ka·a. Election Commission of India (ECI)-ni dongimin niamko ja·rike election-na skang EVM-ko bikotaon name dake nirikkiesa bikota, machine check ka·o maiba kam ka·gijaniko nika ong·ode uko watja. Polling station-rangona watatna skang name dake check ka·esa wata. Una agreba election-na skang machine-ko ranta ka·e nichenga. Jedakode election-ni somoio maming dakeba neng·nikaniko chagrongjana gita polling officer-rangni mikkango ranta ka·e nia.
Uandake VVPAT-o puongipani ong·gija bimingko mesoka ong·ode, voter ba puongipa badi ka·na man·a, badi ka·ani jolan pollling -ko dondipate gimik representative-rangni mikkango machine-ko ranta ka·e nia. Puongiparang puona somoio machine name dake kam ka·ja ong·ode badi ka·na man·a ineba DC, jinma manderangna u·iataha.
