Tura: Police-ni FIR-o biming segata man·gipa saksa Sahjahan Islam, an·tangko dos dongja ine agane, uni bimingko FIR-oniko ra·galchina mkol·molaha. Golmal ong·ani somoio ua a·sel ong·gipa biapon dongja ine aganaha.
February 15 tariko police-ni mamlako segatani gita, Sofiqul Islam-ni dilanio TMC worker-rang NPP-ni mitam worker-rangko dokaha ine police kobor man·soaha. Indake Dadenggre SDPO-ni dilanio police dolrang a·sel ong·gipa biapona sokangaon sakgni jokkom ong·e donggiparangko nikeaha. Saknaa man·giparang, Sofiqul Islam, uamangko dokaha ine police-na aganaha.
FIR-o Shahjahan-ni bimingkoba segataha. Indiba Islam, an·tangni kosako matnangako kakket ong·ja ine aganaha, maina police-ni janapgipa sal aro somoi 7.35 bajio ua Phulbari PS-o gipin mamla segata donggipana soi ka·na re·angaha. Uni ja·man Phulbari-on walni 11 bajiona dongaha.
PS-ni CCTV-o angni donganiko sakki man·aigen. Saobasa angni bimingko tol·e ra·aha. Angni bimingko FIR-o janapako u·ie anga jagokpilaha, angni bimingko maina tol·e on·aha, ia mamlako sandiatako nangnikenga, ine Islam, aganaha.
