BJP aro NPP-ko jiksesa, TMC-ko uamangni degipa ine Congress matnanga

WILLIAMNAGAR: Bharatiya Janata Party (BJP) aro National People’s Party (NPP) dolrangko jiksesa aro Trinamool Congress (TMC)-ko uamangni degipa ine Indian National Congress (INC)-ni dilgiparang, Williamnagar-ni candidate Deborah C Marak-na campaign ka·na gita Warima-o tom·aniko ong·atanio matnangataha.
Ia tom·aniko ong·atanio AICC-ni general secretary Mukul Wasnik, Congress MP Benny Behnan, AICC-ni Meghalaya Coordinator Anil Thomas, AICC-ni observer Padi Richo aro Gambegre-ni Congress candidate Saleng Sangma-ba dongpae bakko ra·angahachim.
Ia tom·anio Gambegre-ni Congress candidate Saleng Sangma, jinmana aganprakangengon, da·o sorkariko rikpiltaina man·genchimode lak 5 kamrangko on·gen ine NPP-ni a·dokni manderangna ku·rachakniko jegalatenba, batanggimin bilsi bongana sorkariko rikanion uamang, hajalni hajal manderangna maming janggi tangani cholrangko on·na man·jaha ine matnangataha.
“Da·o election-ni somoio uamang manderangna kamrangko on·gen ine ku·rachakenga indiba batanggimin bilsi bongani gisepo uamang hajalni hajal manderangna maming kamrangkon on·na man·jaha. Uamang muster roll-rangkoba kamrangoniko ra·gale galaha aro da·o lak 5 kamrangko on·na ku·rachakenga,” ine Saleng parakataha.
NPP-chi dilgipa sorkari, bang·bea kamrangko matchotatna man·jae gong kror 4000 tangkarangko ma·mong sorkarina walpilataha aro gong kror 14,000 tangkarangkoba loan dake ra·aha ineba ua matnangataha.
“Ia loan-rangko sawa gamna nanggen an·ching ramram manderangsa gamna nanggen. Uamang FOCUS scheme-ni ning·o manderangna tangkarangko gamna jakkalahani gimin da·o ma·manti bosturangni damrang rakbatskagnok. Ia tangkarangko uamang an·chingni kajinarangko bariate an·chingonikosa ra·skagnok. An·ching ia grorangko an·chingni current bill-rangchi gamskana nanggnok,” ine Saleng aganaha.
TMC-ni WE Card aro MYE Card scheme-rangko jegalatskaengon, saoba banoba TMC-ni ATM-rangko nikahama ine Saleng sing·doataha.
“Ia program-rang chu·sokbebegipa ong·ahaode maini gimin West Bengal a·dokni manderang da·oba kangal cha·asitokkuenga?” ine ua sing·doataha.
Ia tom·anio AICC-ni observer Padi Richo-ba jinmana aganprakangengon, PA Sangma aro Mukul Sangma sakgnikon Congress dol, chief minister-rang ong·atahachim indiba da·o uamangni dolrangan Congress-ko namgijagipa dol ine matnangtokskaenga ine parakataha. BJP aro NPP dolrangko jikse ineba ua matnangataha.
Uni ja·man AICC-ni Meghalaya coordinator Anil Thomas-ba jinmana aganprakangengon, Padi Richo-ni agangipa kattarangna chakpae, TMC dolan, BJP aro NPP dolrangni degipa gita ong·skaenga ine parakataha.
Ia tom·bimonganio AICC-ni general secretary Mukul Wasnik-ba jinmana aganprakangengon, Meghalaya a·dokara namen nitobegipa a·dok ong·achim indiba a·songo kangalbatsranggipa a·dokrangoni damsa ong·kuenga ine parakataha.
“Batanggimin bilsi bongani gisepo Meghalaya a·doko tangka jakkalsretani namen bilongbataha. NPP-chi dilgipa MDA sorkario BJP-ba apsan bakan ong·paachim indiba da·o uamang iana NPP-kosa matnanggopna jotton ka·skaengaha. Kakketko agangenchimode BJP aro NPP dolgnian tangka jakkalsretanio jak donggiparang ong·a,” ine Wasnik aganaha.