TURA: Saubhagya scheme-ni ning·o West Garo Hills a·jani Tikrikilla, Phulbari, Dadenggre, Rajabala aro Selsella jolrango donggipa dingtang dingtang songrango, manderangna bijolini bill-rang sokengoba, bijoliko man·tokjaenga ine kobor on·aha.
Koborko on·ani gitade, ia songrango donggipa manderangni bimingrang, Saubhagya scheme-na MePDCL-o donggenchimoba, bijolikode man·tokkujaengachim.
Ia Saubhagya scheme-ko Meghalaya a·doko 2018 bilsio National People’s Party (NPP)-ni dilanichi sorkariko rikani ja·man ra·gatahachim aro ua somoio NPP-ni dilgipa James K Sangma, power minister ong·engachim. Ia scheme-ara bijoli donggijagipa dam 1,39,267 nokdangrangna bijoliko on·na ra·gatgipa scheme ong·achim ine nikna man·a.
Ia Saubhagya scheme-ni kamrangko ka·na gita Satnam Global minggipa company-na contract-ko on·ahachim indiba ia scheme-ni kamrangko ka·anio gong kror 149-na baten tangkarangko jakkalsretaha ine CAG-ni report-o parakahachim.
Koborko on·ani gitade, kosako janapgimin revenue circle-ni ning·o donggipa dam 39 songrangko ia scheme-ni ning·o man·ahachim indiba ia songrangona re·ange nion, ia songrango donggipa bang·bata nokdangrangan bijoliko man·tokkujaenga ine nikna man·aha.
“Chengonin chinga andalaosa dongna nangtokkuenga indiba bijolini bill-rangko anga man·soon namen jagokman·pilaha. Chingna ia scheme-ni ning·o bijoliko on·ani ong·enga ong·ode maikai chinga da·onan andalaosa dongna nangtokkuenga aro chingna ia scheme-ni ning·o bijoliko on·ani tangka paisarangara bachi gimaaha?” ine Tikrikilla revenue circle-ni ning·o donggipa Dodanggre songni saksa Charak Sangma sing·doataha.
Ia songni manderangko, Satnam Global company-ni manderang, completion report-rangoba soi ka·china aganaha aro songni manderang bang·batan mamingkoba ma·sijae soi ka·aha ineba songni manderang parakataha.
Ia jolni bang·bata biaprangon, bijolirangko on·aha ine mesokna gita krongrangkoba songmika dakaha indiba completion report-ko man·soani ja·man, ia bijoli krongrangko ra·galpilaha ineba songni manderang parakataha.
“Chingni songo changgittamna kingking survey-rangko ka·ahani gimin chinga bijoliko man·pagnok ine ka·dongsoengachim indiba ja·mano ia survey-rangara tol·gipasa ong·aia ine chinga ma·sina man·aha,” ine Kangkaronggre songni Nokma Habelson Marak parakatskaaha.
“Completion report-ko man·ani ja·man department-ni official-rang an·tangtangan ia songrangona re·bae niena nangachim indiba official-rang maming ja·kurangko de·jahani a·selan chingko ia manderang cha·bokna man·aha,” ine Matramchigre songni sakgipin Gatjen Sangma parakatskaaha.