AMPATI: Section 144 CrPC-ni ning·o an·tangna on·gimin bilo pangchake, da·al February-ni 25 tarik attam 4:00 baji dipet South West Garo Hills a·jani pilak biaprangon, gital u·iataniko on·taikujaskal, jinma tom·bimonganirangko SWGH a·jani District Magistrate champengataha.
Assembly election-ko nama bewalo aro jakgitele ong·atna man·na gita aro pu·ongipa manderangko ong·gija kamrangchi didianiko champengna gita jinma tom·bimonganirangko champengatna nangao ga·akaha ineba District Magistrate u·iataha.
Pu·onanirang matchotkujaskal konta 48-ni gisepo sakbonga ba una bate tom·bimongani ba uandake dingtang dingtang program-rangko ong·atanikoba District Magistrate champengataha.
Ia ge·etani, February-ni 25 tarik attam 4:00 baji dipet, South West Garo Hills a·jani ning·o donggipa 53-Ampati (ST), 54-Mahendraganj (ST) aro 55-Salmanpara (ST) Assembly constituency-rangnan ong·gen.