SHILLONG: Meghalaya Legislative Assembly-na Sombar salo election-ko ong·atani a·dok gimikon tom·tome matchotangaha aro a·dok gimiko pu·onani 76.32 percent gapaha ine Election official-rang parakataha.
Sombar salo, Meghalaya a·dok gimiko donggipa dam 60 Assembly constituency-oni dam 59 constituency-rango manderang, an·tangtangni gital dilgipako seokna gita pu·ontokahachim.
Re·anggipa February-ni 20 tariko, a·dokni gitcham home minister aro United Democratic Party (UDP)-ni candidate HDR Lyngdoh, tanggitik ka·tong saaniko man·e siangahani gimin Sohiong constituency-ode MLA election-ko dingtang salona ra·doatskaahachim aro uandaken Sombar salo, a·dok gimikni dam 59 constituency-rangna ia election-ko ong·atchengahachim.
“Meghalaya a·dok gimikni dam 3,419 polling station-rangon pu·onani tom·tome matchotangaha aro darang polling station-onikoba maming a·sel ong·anirangko knasona man·jaha,” ine Sombar attamo, Election Commission parakataha.
Meghalaya a·doko ga·nanggijagipa, a·brirangko dona nanggipa, chiringrangko ga·batna nanggipa polling station-rang bang·en donggenchimoba polling party-rang, kamtangtangko namen chu·sokataha ineba Election Commission parakataha.
Election Commission-ni u·iatani gitade, Meghalaya a·dok gimiko gari gora soke man·gijagipa polling station-rang dam 74-mangni gita donga aro mitam polling station-rangonade polling party-rang, ringrango aro wa·arangchi tarigipa dolongrangko batesa re·angna nangtokaha.
Koborko man·soani gitade, da·o dipet North Tura constituency-o pu·onani 55.5 aro South Tura constituency-o pu·onani 52.1 percent ong·e a·dok gimiko komibate pu·ongipa constituency-rang ong·enga.
Indake ong·engon, East Jaintia Hills, Ri Bhoi, South West Garo Hills aro West Garo Hills a·jani badiaba badiaba biaprangoba manderang, walni 9:00 baji batpilonan pu·ongiparang dongkuengani gimin pu·onani percentage batangkunaba gnang ine Meghalaya a·dokni Chief Electoral Officer (CEO) FR Kharkongor parakatskaaha.
A·dokni bang·bata biaprangon pu·onani tom·tome matchotahaoba badiaba badiaba polling station-rango EVM-rang nosto ong·ani a·sel bang·gija neng·nikanirangko chagrongna nangaha ineba CEO u·iataha.
Ia chang Meghalaya Assembly election-o dingtang dingtang dolrangoni aro Independent candidate-rang gimik sak 369 candidate-rang susaenga aro ia sak 369 candidate-rangoni sak 36-de me·chik candidate-rang aro sak 44-de Independent candidate-rang ong·achim.
Ia Assembly election-o susaenggipa sak 369 candidate-rangoni sak 60-de BJP-oni, sak 60-de Indian National Congress (INC)-oni, sak 57-de NPP-oni, sak 56-de TMC-oni, sak 46-de UDP-oni, sak 11-de HSPDP-oni, sak 9-de PDF-oni, sak 2-de GNC-oni, sak 3-de JD(U)-oni, sak 2-de RPI-oni, sak 6-de RPI (Athawale)-oni, sak 18-de VVP-oni aro sak 44-de Independent candidate-rang ong·engachim.
Ia Assembly election-ni result-rangko re·baenggipa March 2 tariko parakskana siengachim.