SHILLONG: Re·anggipa February 27 tariko ong·atanggipa Meghalaya Legislative Assembly election-ni result-rangko da·al Bristibar salni bako parakatgnok aro vote-rangko channa gita Election Commission, a·dok gimiko dam 13 counting centre-rangko tarisoaha.
Vote channaniko da·al pring 8:00 bajioni a·bachengatenga aro vote-rangko channa gita tarisogimin dam 13 counting centre-rangoni dam 12-de district headquarter-rango aro damsade Sohra civil sub-division-o ong·enga.
Meghalaya a·dokni Chief Electoral Officer (CEO) FR Kharkongor-ni u·iatani gitade, Assembly election-na rimbagipa central armed police force (CAPF)-rangoni dol 22-kode EVM-rangko donchakgipa strong room-rangko nitimna aro gipin kamrangna ra·rikaha.
Counting ba vote-rangko channani salona Election Commission, sak 27 counting observer-rang baksana sak 549 micro observer-rangko donataha ineba CEO parakataha.
Ia 2023 bilsini Assembly election-o gimik sak 369 candidate-rang susaangahachim aro ia sak 369 candidate-rangoni sak 36-de me·chik candidate-rang aro sak 44-de Independent candidate-rang ong·achim. 2018 bilsini Assembly election-ode sak 32 me·chik candidate-rangko man·chape gimik sak 329 candidate-rang susaskaahachim.
Meghalaya a·doko dam 60 Legislative Assembly constituency-rang donggenchimoba, Sohiong constituency-ode gitcham home minister aro UDP-ni candidate HDR Lyngdoh siangahani gimin election-ko dingtang salona ra·doatskaahachim.
Meghalaya a·doko National People’s Party (NPP), sorkariko rikpiltaina ka·dongsoengon, BJP, Trinamool Congress (TMC), UDP, Congress aro gipin dolrangba sorkario dingtanganiko nikna ka·dongsotokskaenga.
Ia Assembly election-o susaenggipa sak 369 candidate-rangoni sak 60-de BJP-oni, sak 60-de Indian National Congress (INC)-oni, sak 57-de NPP-oni, sak 56-de TMC-oni, sak 46-de UDP-oni, sak 11-de HSPDP-oni, sak 9-de PDF-oni, sak 2-de GNC-oni, sak 3-de JD(U)-oni, sak 2-de RPI-oni, sak 6-de RPI (Athawale)-oni, sak 18-de VVP-oni aro sak 44-de Independent candidate-rang ong·engachim.
Dingtang dingtang News channel-rangni exit polls-o mesoksamsoani gitade, ia changoba pilak dolrangan nanga gita seat-rangko chena man·jawa aro NPP dam 17-oni dam 26 seat-rangko chenaba gnang.
Dolsanchi Meghalaya sorkariko rikna gita komibeoba dam 31 seat-rangko chena nangskaengachim.