SHILLONG: BJP, HSPDP aro Independent MLA-rangni bakrimanichi National People’s Party (NPP), gital sorkariko rikna ka·donge a·dokni Governor-na chittirangko on·eahaoba bon·kamgipa somoio Hill State People’s Democratic Party (HSPDP)-ni dilgiparang, NPP baksa bakrimaniko ra·pilna chittiko seatahani gimin NPP-ni ka·donganiko ra·ongalani gita ong·skaaha.
BJP-ni MLA sakgni aro Independent MLA sakgni baksana HSPDP-ni MLA sakgniba NPP-ni sorkariko rikanio bakrimaniko gita NPP-ni national president Conrad K Sangma-na seatahachim indiba ja·mano HSPDP-ni dilgiparang, NPP-ni national president-na sedoatskaenba, NPP baksa bakrimaniko ra·pilna u·iatskaaha.
Koborko on·ani gitade, BJP aro NPP dolgniko gale, Trinamool Congress (TMC)-ni dilgipa Mukul Sangma, gipin dolrang, jekai Indian National Congress (INC), United Democratic Party (UDP), Voice of the People’s Party (VPP), People’s Democratic Front (PDF) aro Independent candidate-rang baksa bakrime sorkariko rikskana miksongengachim.
Batanggimin bilsi bongana NPP-ni dilanichi MDA sorkariko chalaianio bang·en tangka paisarangko jakkalsretanina aro dingtang dingtang ong·gija kamrangna matnanganiko man·ahani gimin ia changode bang·bata political dolrangan NPP baksa bakrimna nangniktokskajaengachim.
Ia bilsini election-o NPP dam 26 seat-rangko chee gital sorkariko rikpiltaina miksongengon, da·o dipet BJP aro Independent candidate sakgnina agrede gipin MLA-rangni bakrimaniko man·skajaengachim.
Meghalaya a·dokni dam 60 donggipa Assembly-o sorkariko rikna gita komibeoba sak 31 MLA-rangko nangengon, da·o dipet NPP-ni sak 26 MLA-rang baksana BJP-ni sakgni aro Independent MLA sakgniko man·chapeba gimik sak 30 MLA-rangsan ong·kuengpitichim.
Indake ong·genchimoba, da·o dipet Sohiong constituency-ni election-kode dingtang salona ra·doate dam 59 constituency-ni election-kosan ong·atengkuani gimin sorkariko rikna gita sak 30 MLA-rangkosan nangskakuenga aro Sohiong constituency-ni election-ko ong·atani ja·manosa sak 31 MLA-rangko nangskaengani gimin ian NPP-ba ka·dongchakna man·aniba ong·skakuenga.