SHILLONG: BJP, Independent candidate sakgni aro HSPDP candidate-rangni bakrimanichi National People’s Party (NPP), gital sorkariko rikna tariahaoba Sukrobar attamo, Hill State People’s Democratic Party (HSPDP)-ni dilgiparang, NPP baksa bakrimaniko ra·pilna gita NPP-ni national president Conrad K Sangma-na sedoatskaaha.
Iani bidingo NPP-ni national president-na sedoatengon, HSPDP-ni MLA sakgni, chong·motan Methodius Dkhar aro Shakliar Warjri-ko sorkari rikanio NPP baksa bakrimna on·jahachim ine HSPDP-ni president KP Pangniang parakataha.
“Sorkariko rikna ja·ku de·anio chinga HSPDP-ni gitade maming bak dongja, uni gimin chinga nang·ni NPP dol baksa bakrimaniko da·al Sukrobar salonin ra·pilenga,” ine Pangniang parakataha.
HSPDP-ni dilgiparang baksa agangrikchenggija HSPDP-ni MLA sakgni, NPP baksa bakrimna gita NPP-ni national president Conrad K Sangma-na chittiko on·eahachim ine nikna man·a.