SHILLONG: Meghalaya a·dokni secretariat-ko Shillong songjinmani dingtang biapona apjitanggen aro ramarango apchangket ong·aniko komiatna gita dolongrangko rikgen ine Sombar salo, National People’s Party (NPP)-ni national president aro gital chief minister ong·na sienggipa Conrad K Sangma parakataha.
Iani bidingo kobor ra·timgiparangna talataniko on·angengon, gital secretariat building-ko Mawpat jolo rikgen aro Shillong songjinmani ramarango apchangket ong·aniko komiatna gita Barik point-oni dolongrangko rikgen ine Sombar salo Sangma parakataha.
“Batanggimin somoirangon chinga biaprangko tik ka·manaha aro da·o master plan-rangko tariengaha. Adita jarangni gisepon chinga secretariat-na design-rangko tarimangnok aro gipin kamrangkoba a·bachenggnok,” ine ua aganaha.
Re·baenggipa bilsi bongani gisepode Shillong songjinmao ramarangni apchangket ong·aniko komiatna man·na ka·dongenga ineba Sangma parakataha.
“Shillong-o ramarang namen apchangket ong·engaha aro bang·bata somoirangon ramarangko apalbatatna chinga biaprangko man·rongja. Ramarango apchangket ong·aniko namatna bang·en neng·nikanirang donga indiba skangonin chinga parking lot-rangko taridapna miksonganirang dongani gimin parking lot-rangkoba taridapna nangenga. Bilsisani gisepon chinga skywalk-koba Barik Point aro PWD complex-oni Police Bazar-ona matchotna ka·dongenga,” ine Chief Minister parakataha.
Shillong songjinmao manderangna re·a doani kolrangko namdapatna gitaba sorkari miksongenga ineba Sangma aganaha.