SHILLONG: An·tangtangni nangnikenggipa dingtanganiko ra·bana man·na gita chadamberangko politics-o bak ra·china, ia bilsio skanggipa changna seokako man·gipa MLA-rang didiataha.
Mawlai-ni Voice of the People’s Party (VPP) MLA Brightstarwell Marbaniang-ni parakatani gitade, chadamberangan gital u·i-ma·sianirang donggipa ong·ani gimin a·dokni namgnina dingtanganiko ra·bagiparang ong·na man·gen.
Mawlai constituency-ara namen dal·begipa constituency ong·a ine janapatengon, sak 60 donggipa Meghalaya Legislative Assembly-o uaba saksa seokako man·gipa ong·e an·tangni daitoko chu·sokatna nanggipa ong·a ine Marbaniang parakataha.
Mawlai constituency-o VPP-ni candidate Brightstarwell Marbaniang, an·tangni sepangbatgipa bobilko 24,262 vote-rangchi chee, skanggipa changna seokako man·ahachim.
Umroi constituency-o skanggipa changna seokako man·gipa MLA Damanbait Lamare-ba, ru·utbea bilsirangna uni constituency-o matchotgija dongenggipa kamrangko ua matchotatna nangnikenga ine parakataha. Umroi constituency-o ua, Trinamool Congress (TMC)-ni George B Lyngdoh-ko chee seokako man·skaahachim.
Apsan daken, Nongstoin constituency-o skanggipa changna seokako man·gipa Congress MLA Gabriel Wahlang-ba, an·tangni constituency-na dangdike on·na kusi ong·enganiko parakataha.
“Anga gama ge·ani aro lekka porani kamrangko namdapatna miksonganirang donga aro chinga opposition-osa ong·genchimoba anga ka·donga, sorkari chingko knachakgen,” ine Wahlang aganaha.
Meghalaya a·doko chadamberangan politics-o nape gital u·ianirangko mesoke on·na nanga ineba ua aganaha.
Indake ong·engon, Mawhati constituency-o skanggipa changna seokako man·gipa Charles Marngar-ba an·tangko seokahani gimin manderangna dangdike on·skana kusi ong·enganiko parakataha.
“Ango maming gam-jinrang dongja indiba manderang an·tangtangni ka·saanichi angko MLA ong·ataha,” ine Marngar aganaha.
