SHILLONG: Mongolbar salo, National People’s Party (NPP)-ni president Conrad K Sangma, gnigipa changna, Meghalaya a·dokni Chief Minister ong·e ku·mikchetangaha aro unbaksana Deputy Chief Minister sakgniko man·chape gipin sak 11 minister-rangba ku·mikchetangaha.
A·dokni Chief Minister aro gipin minister-rangni ku·mikchetani somoio a·songni Prime Minister Narendra Modi, Union Home Minister Amit Shah, Assam-ni Chief Minister Himanta Biswa Sarma, Sikkim-ni Chief Minister Prem Singh Tamang aro Jharkhand a·dokni Chief Minister Hemant Soren-ba dongpae bak ra·angaha.
Minister-rangni ku·mikchetaniko, Meghalaya a·dokni Governor Phagu Chauhan, Shillong songjinmani Raj Bhawan-o dilangaha.
Ia chang, Prestone Tynsong aro Sniawbhalang Dhar, a·dokni Deputy Chief Minister-rang ong·e ku·mikchetangaha.
Mongolbar salo ku·mikchetanggipa minister-rangoni sakchetde NPP-ni, sakgnide UDP-ni, saksade BJP-ni aro sakde HSPDP-ni ong·a.
A·dokni Chief Minister Conrad K Sangma aro sakgni Deputy Chief Minister-rang baksana NPP-ni gipin minister-rangara, Marcuise N Marak, Rakkam A Sangma, Ampareen Lyngdoh, Comingone Ymbon aro A T Mondal ong·a. UDP-ni minister sakgniara Paul Lyngdoh aro Kyrmen Shylla, BJP-ni Minister-ara Alexander Laloo Hek aro HSPDP-ni Minister-ara Shakliar Warjri ong·a.
Sak 12 Cabinet minister-rangoni sak 8-de Khasi Hills joloni aro Chief Minister-ko man·chape sak 4-de Garo Hills-oni ong·skaa.
Ku·mikchetaniko dakna gita Raj Bhawan-ona re·angna skang, a·dokni Chief Minister aro pilak cabinet minister-rangan prayer meeting-o bakko ra·angchengahachim.
NPP-chi dilenggipa MDA 2.0 sorkario, NPP-ni sak 26, UDP-ni sak 11, BJP-ni sak 2, HSPDP-ni sak 2 aro Independent MLA sakgni donge gimik sak 45 MLA-rang bakrimahachim.
