Tura: Biotech KISAN Hub, NEHU, Tura Campus, Meghalaya, Sonibar sal March 11 tariko South West Garo Hills-ni Cherong SHG, Katuli Walkamgre-o arp Bandalkona Training Centre-o training cum input distribution program-ko ong·ataha.
Programme-ko Biotech KISAN Hub-ni project coordinator Dr Arindam Barman, Adil Gandhian Society (AGS)-ni secretary Michael Sangma, (AGS)-ni membor Nathan Ch Momin, Biotech KISAN Hub, NEHU, Tura Campus-ni project assistant Neha M Sangma aro project activity assistant Amy D Shira- uamang dilangaha.
Program-o Dr Barman, game cha·giparangko baringbelati, capsicum, naga ja·lik ba raja ja·lik ba uandakgiparangko ge·china aro a·sal bikotchina didiangaha, ian game cha·giparangni man·gnikon bilsisaon baridapatgen.
Ampati jolni socio-economic -ko ra·dona miksonganio programe-ko ong·atangaha.
Me·su-samjakrangko scientific bewalo maidake ge·na man·gen aro maidake a·salko tarina man·gen, iarangni gimin Neha M Sangma aro Amy D Shira-mang training-o skie on·angaha.
Iarangna agreba Cherong SHG-o be·en gita bilgrigiparangnaba training-ko ong·ataha, aro game cha·giparangni chagronggipa neng·nikarangko namatna gita scientist aro game cha·giparangni gisepo agangrikna cholko on·aha. Indake game cha·giparangna me·su-samjakrangni bitchilrangko suale on·angaha.
Indake ong·engon game cha·giparang, training program-o bakko ra·e ge·a-gamani bidingo bang·ako skidape ra·na man·ani gimin kusi ong·ako paraktokaha. Aro mikkangchiba iandakgipa training-ko ong·atchina mol·molangaha.
