Congress dolko watna miksonganirang dongja: Pala

SHILLONG: Re·baenggipa 2024 bilsini Lok Sabha election-o ua gipin doloni susana miksonganirang dongja ine Shillong-ni Lok Sabha MP aro Meghalaya Pradesh Congress Committee (MPCC)-ni president Vincent H Pala parakataha.
Iani bidingo kobor ra·timgiparang baksa agangrikengon, Meghalaya a·doko Congress dolko tangchaatpiltaiani ja·man ua Congress dolko watna miksonganirangba dongja ine Pala parakataha.
Adita salrangna skang ong·atanggipa Meghalaya Legislative Assembly election-o Congress dol, seat dambongakosan cherikna man·e chu·sokgipa ong·jahani gimin MPCC-ni president gipin dolrango napskana miksongenga ine manderangni gisepo chanchichipanirangko knasona man·ahachim.
Kobor on·timgiparangni u·iatani gitade, re·baenggipa bilsio ong·atna sienggipa Lok Sabha election-o ua Shillong Lok Sabha seat-ko chepiltaina ka·donganirang komiengahani gimin ua NPP-o napskae Lok Sabha election-o susaskanaba gnang.
Indake ong·genchimoba, manderangni iandake chanchichipaniko ua jegalatskaenba, ua Congress dolko watbebena sikgenchimode ru·uta somoirangna skang, dingtang dingtang dilgiparangni wate katengmiting somoirangon uaba katenggnokchim ine Pala parakataha.
“Anga da·o brigipa changna Congress candidate ong·e Shillong Lok Sabha seat-ko chepiltaina susaanggen. NPP-oni susaani kattade nakatsrangja. NPP-o napna gita anga dilgiparang baksa agangrikenga ine aganania kakket ong·ja,” ine Shillong-ni Lok Sabha MP aganaha.
Meghalaya a·doko Congress dolni dilgiparang, uko kamoniko ra·galna miksongenggipani bidingo ua an·tangde maming kobor man·soa dongkuja ine Sonibar salosan, MPCC-ni president Vincent H Pala parakatahachim.
“Haida, Congress dolni mitam dilgiparang, Meghalaya a·doko Congress dolni gital dilgipako songna nangnikengakon indiba da·o dipet angonade iandakgipa maming koborrang sokbaa dongkuja,” ine Pala aganahachim.
Indake ong·engon, Parliament-ni Budget Session matchotahaon ua Congress dolko bilakatpiltaina gita a·dokni dingtang dingtang biaprangona wenanggnok ine MPCC-ni president parakataha.
Re·baenggipa bilsion KHADC aro JHADC election-koba ong·atna siengani gimin ua ia election-na skangan Congress dolko bilakatpiltaina miksongenga ineba Pala aganaha.